ડેડિયાપાડાના જૂના મોઝદામાં વિદ્યાર્થીઓ ટ્રાન્સપોર્ટેશનના અભાવથી 8 કિ.મી.પગપાળા ચાલવા મજબૂર:
શ્રોત: ગ્રામીણ ટુડે ન્યુઝ, 24×7 વેબ પોર્ટલ
શું આવી રીતે ભણશે ગુજરાત!!!
ડેડિયાપાડાના જૂના મોઝદામાં વિદ્યાર્થીઓ ટ્રાન્સપોર્ટેશનના અભાવથી 8 કિ.મી.પગપાળા ચાલવા મજબૂર:
સરકાર ટ્રાન્સપોર્ટેશનની સુવિધા આપવામાં ઉણી ઉતરી:
સર્જન વસાવા, ડેડિયાપાડા: નર્મદા જિલ્લાના ડેડીયાપાડા તાલુકામાં આવેલ જુના મોઝદા ખાતે આવેલ સરકારી માધ્યમિક શાળામાં અભ્યાસ કરવા આવતા વિદ્યાર્થીઓ પગપાળા ચાલવા મજબૂર બની ગયા છે.
ડેડીયાપાડા તાલુકાના અંતરિયાળ વિસ્તારોમાં ટ્રાન્સપોર્ટેશન ની સુવિધા ન હોવાને કારણે વિદ્યાર્થીઓ 8 થી 10 કિલોમીટર ચાલીને અભ્યાસ કરવા મજબૂર બન્યા છે. જેની સીધી અસર વિદ્યાર્થીઓના અભ્યાસ ઉપર પડી રહી છે. નર્મદા જિલ્લો આદિવાસી બહુલ્ય વસ્તી ધરાવતો જિલ્લો છે. ત્યારે જૂના મોઝદા ખાતે અભ્યાસ અર્થે આવતા વિદ્યાર્થીઓ 8-10 કિ. મી.વિશાળ જંગલ માંથી પગપાળા ચાલવા અથવા ખાનગી વાહનોમાં ભારે ભીડમાં બેસીને શાળાએ આવવા જવા મજબૂર બન્યા છે. જેની સીધી અસર વિદ્યાર્થીઓના પરિણામ પર જોવા મળે છે.
ડેડીયાપાડા ના વિસ્તારો ના ગામડાઓ જેવા કે પીપલોદ, વાઘ ઉમર, સાંકડી, ગીચડ જેવા ગામો માંથી વિદ્યાર્થીઓ અભ્યાસ અર્થે આવે છે. જેઓ આર્થિક રીતે સક્ષમ નથી તેમ છતાં વાલીઓ પોતાના સંતાનોને ગમે તે ભોગે અભ્યાસ કરાવી રહ્યા છે. કેટલાક વાલીઓ પોતાના બાળકોને મજબૂરી એ ખાનગી વાહનોમાં ભીડનો ભાગ બનાવીને શાળામાં મોકલવા મજબૂર બન્યા છે. ત્યારે શાળાના અસંખ્ય વિદ્યાર્થીઓ ટ્રાન્સપોર્ટેશન ની સુવિધાના અભાવે 8 કિ.મી.થી લઇને 10 કિ.મી. સુધી પગપાળા ચાલીને શાળાએ આવવા જવા મજબૂર બન્યા છે.
વિદ્યાર્થીઓ શાળાના સમય કરતા એકથી દોઢ કલાક પહેલા ઘરેથી નીકળીને પગપાળા જૂના મોઝદા જાય છે અને સાંજે શાળા છૂટયા પછી આખા દિવસના અભ્યાસ બાદ થાકીને વિશાળ જંગલ માંથી પગપાળા ઘરે જાય છે. ત્યારે જંગલમાં જીવના જોખમે વિદ્યાર્થીઓ રસ્તો પસાર કરવા મજબૂર બન્યા છે, જેઓ ઘરે પહોંચીને થાકીને અભ્યાસ કરવાને બદલે સૂઈ જાય છે. આ વિદ્યાર્થીઓ ભણી ગણીને કંઇક બનવા માટે શિયાળો, ઉનાળો અને ચોમાસામાં પગપાળા ચાલીને શાળાએ જઇ રહ્યા છે.
કેટલાક વિદ્યાર્થીઓ ખાનગી વાહનોમાં બાળકો ભારે ભીડમાં એકબીજા ઉપર સવાર થઈને બેસીને શાળાએ અવર જવર કરે છે. આવા ખાનગી વાહનમાં કેટલીકવાર વાહનો રસ્તામાં બગડી જતાં બાળકો પાસે વાહનચાલકો ધક્કા મરાવવા ના કિસ્સા પણ સામે આવી રહ્યા છે અને આવા ખાનગી વાહનમાં કેપેસિટી કરતા દસ ઘણા મુસાફરો બેસાડીને બાળકોના જીવ જોખમમાં મૂકી રહ્યા છે.
સરકાર ટ્રાન્સપોર્ટેશન ની સુવિધા આપવામાં ઉણી ઉતરી છે, એકબાજુ સરકાર આદિવાસી બાળકોના અભ્યાસ માટે કરોડો રૂપિયાનું આંધણ કરી રહી છે, નવી નવી યોજનાઓ લાવે છે, પરંતુ અંતરિયાળ વિસ્તારના વિદ્યાર્થીઓને ટ્રાન્સપોર્ટેશન ની સુવિધા આપવામાં ઉણી ઉતરી હોય તેમ લાગી રહ્યું છે. જેની સીધી અસર આ વિસ્તારના વિદ્યાર્થીઓના અભ્યાસ ઉપર પડી રહી છે. ત્યારે વિદ્યાર્થીઓ માટે બસ મૂકવામાં આવે અને વિદ્યાર્થીઓને બસ પાસની સુવિધા પણ કરી આપવામાં આવે તો પંથકના વિદ્યાર્થીઓની સમસ્યાનો હલ થાય તેમ છે.
