ગુજરાતમાં ‘જર્નાલિસ્ટ પ્રોટેક્શન એક્ટ’ની માંગ ઉગ્ર: પ્રેસ કૌનશિલ ઓફ ઇન્ડિયાનો કેન્દ્ર-રાજ્ય સરકારને મહત્વપૂર્ણ સંદેશ:
શ્રોત: ગ્રામિણ ટુડે ન્યુઝ ૨૪x૭ વેબ પોર્ટલ
ગુજરાતમાં ‘જર્નાલિસ્ટ પ્રોટેક્શન એક્ટ’ની માંગ ઉગ્ર: પ્રેસ કૌનશિલ ઓફ ઇન્ડિયાનો કેન્દ્ર-રાજ્ય સરકારને મહત્વપૂર્ણ સંદેશ:
ગાંધીનગર: ગુજરાત રાજ્યમાં પત્રકારોની સુરક્ષા સુનિશ્ચિત કરવા માટે “જર્નાલિસ્ટ પ્રોટેક્શન એક્ટ”અમલમાં મૂકવાની માંગ હવે વધુ ઉગ્ર બની છે. આ મુદ્દે કરાયેલી રજૂઆતના અનુસંધાને Press Council of Indiaએ કેન્દ્ર સરકાર તથા ગુજરાત સરકારને મહત્વપૂર્ણ પ્રતિસાદ પાઠવ્યો હોવાનું જાણવા મળ્યું છે. પ્રેસ કાઉન્સિલે તા.૧૭-૦૯-૨૦૨૫ના ઈમેઇલ દ્વારા સ્પષ્ટ કર્યું છે કે તે સંસદ દ્વારા સ્થાપિત એક સ્વાયત્ત, કાનૂની અને અર્ધ-ન્યાયિક સંસ્થા છે, જેનો મુખ્ય હેતુ પ્રેસની સ્વતંત્રતા જાળવવાનો અને અખબારો તેમજ સમાચાર એજન્સીઓના વ્યાવસાયિક ધોરણોને મજબૂત બનાવવાનો છે. કાઉન્સિલે જણાવ્યું છે કે પત્રકારોની સલામતી અને પ્રેસ સ્વતંત્રતા સામેના ખતરાઓને તે અત્યંત ગંભીરતાથી લે છે. વર્ષ ૨૦૧૫માં પત્રકારોની સુરક્ષા અંગે તૈયાર કરાયેલા વ્યાપક અહેવાલમાં કેન્દ્ર સરકારને કાયદાકીય માળખું ઘડવાની ભલામણ કરવામાં આવી હતી. તેમાં પત્રકારો પર થતા હુમલા અને ધમકીઓને ગુનાહિત જાહેર કરવું કેસોની ઝડપી સુનાવણી માટે વિશેષ અદાલતો રચવી, તાત્કાલિક તપાસ માટે ટાસ્ક ફોર્સ સ્થાપવી અને પત્રકારોની હત્યાના કેસો નિર્ધારિત સમયમર્યાદામાં રાષ્ટ્રીય એજન્સીને સોંપવાની જોગવાઈઓનો સમાવેશ થાય છે. આ ઉપરાંત, પત્રકારો સામે કેસ નોંધતા પહેલાં ઉચ્ચ અધિકારીની મંજૂરી ફરજિયાત કરવી, પીડિત પત્રકારોના પરિવારને આર્થિક સહાય અને સારવાર ખર્ચની વ્યવસ્થા કરવી તથા રાજ્ય સ્તરે હાઈ-પાવર્ડ કમિટીઓ રચવાની પણ ભલામણ કરવામાં આવી છે. સંઘર્ષજનક પરિસ્થિતિઓ, કુદરતી આપત્તિઓ તેમજ સંવેદનશીલ વિસ્તારોમાં અહેવાલ આપતા પત્રકારોની સુરક્ષા માટે મીડિયા, પોલીસ અને સુરક્ષા દળો માટે માર્ગદર્શિકા પણ તૈયાર કરવામાં આવી છે. તેમાં ફ્રીલાન્સ, વેબ પોર્ટલ અને યુટ્યુબ સાથે જોડાયેલા પત્રકારોને માન્યતા, વીમા સુવિધા અને મૃત્યુના કિસ્સામાં વળતર જેવી જોગવાઈઓનો સમાવેશ થાય છે. માહિતી અને પ્રસારણ મંત્રાલય દ્વારા પત્રકારો સામે હિંસા અટકાવવા માટે તૈયાર કરાયેલા બે વિધેયકોને પણ પ્રેસ કાઉન્સિલે સમર્થન આપી, દેશવ્યાપી સમાન કાયદો લાવવાની ભલામણ કરી છે. ઉપરોક્ત તમામ પરિસ્થિતિને ધ્યાનમાં રાખીને, શ્રી શેખ દ્વારા ઉઠાવવામાં આવેલા મુદ્દાઓ કેન્દ્ર સરકાર અને ગુજરાત સરકાર બંને માટે મહત્વપૂર્ણ હોવાનું પ્રેસ કાઉન્સિલે નોંધ્યું છે. આ સંદેશાની નકલ જરૂરી કાર્યવાહી માટે ગુજરાત સરકારને મોકલવામાં આવી હોવાનું પણ જાણવા મળે છે. પરિણામે ગુજરાતમાં પત્રકારોની સુરક્ષા માટે વિશેષ કાયદાની માંગ હવે વધુ જોર પકડી રહી છે.
તાજેતરમાં પ્રાપ્ત થયેલી માહિતી અનુસાર શ્રમ અને રોજગાર મંત્રાલય નવી દિલ્હી ભારત સરકાર દ્વારા હવે Labour Codes હેઠળ ડિજિટલ ઑડિયો-વિઝ્યુઅલ કામદારો, ઇલેક્ટ્રોનિક મીડિયામાં કામ કરતા પત્રકારો, ડબિંગ કલાકારો અને સ્ટંટ કલાકારોને ઔપચારિક રીતે સમાવવામાં આવ્યા છે.
દરેક કર્મચારીને હવે ફરજિયાત નિમણૂક પત્ર આપવામાં આવશે, જેમાં હોદ્દો, વેતન અને સામાજિક સુરક્ષા સંબંધિત વિગતો સામેલ હશે. તેમ પ્રેસ ઇન્ફોર્મશન બ્યુરો દ્વારા સોસીયલ મીડિયા પ્લેટફોર્મ ઉપર પેપ્લેટ દ્વારા જાહેરાત કરવામાં આવી હતી.
