સાગબારા જંગલ જમીન મુદ્દે અનંત પટેલનો સરકાર પર સીધો પ્રહારઃ “હવે જેલ ભરો આંદોલન માટે તૈયાર છીએ”
શ્રોત: ગ્રામિણ ટુડે ન્યુઝ, 24×7 વેબ પોર્ટલ
સાગબારા જંગલ જમીન મુદ્દે અનંત પટેલનો સરકાર પર સીધો પ્રહારઃ “હવે જેલ ભરો આંદોલન માટે તૈયાર છીએ”
“અમે બુઠા તીર-કામઠા લઈને બેઠા નથી”: અનંત પટેલનો સરકાર પર પ્રહાર
“ભાજપના બે મોટા આખલાની લડાઈમાં આદિવાસીઓ પીસાઈ રહ્યા છે”: અનંત પટેલ
સર્જન વસાવા, ડેડિયાપાડા: સાગબારા વિસ્તારમાં જંગલ જમીન પર ખેડાણના હકને લઈને ચાલી રહેલા આદિવાસી ખેડૂતોના આંદોલન વચ્ચે કોંગ્રેસના ધારાસભ્ય અનંત પટેલે સરકાર, ભાજપના મંત્રીઓ અને સાંસદો સામે આકરા આક્ષેપો કર્યા છે.
આદિવાસી ખેડૂતોના હક માટે ચાલી રહેલી લડત અંગે અનંત પટેલે જણાવ્યું હતું કે, “અમે બુઠા તીર-કામઠા લઈને બેઠા નથી, ગાંધીજીના માર્ગે લડી રહ્યા છીએ.” તેમણે આંદોલનને અહિંસક અને લોકશાહી માર્ગે આગળ વધારવાની વાત કરી હતી.
ભાજપ પર નિશાન સાધતા અનંત પટેલે આક્ષેપ કર્યો કે, “ભાજપના બે મોટા આખલાની લડાઈમાં આદિવાસીઓ પીસાઈ રહ્યા છે.” તેમણે જંગલ જમીનના પ્રશ્ને સરકારની કામગીરી સામે પણ સવાલો ઉઠાવ્યા હતા.
સાંસદ મનસુખ વસાવાની ગેરહાજરી અંગે સવાલ ઉઠાવતા અનંત પટેલે કહ્યું હતું કે, “આજે કોઈ પાર્ટીનો કાર્યક્રમ નથી, છતાં સાંસદ મનસુખ વસાવા ક્યાં દેખાતા નથી?” જંગલ જમીનના મુદ્દે તેમણે સાંસદ સહિત ભાજપના નેતાઓની ભૂમિકા સામે પણ આકરા આક્ષેપો કર્યા હતા.
આંદોલન આગળ વધુ ઉગ્ર બનાવવાના સંકેત આપતા અનંત પટેલે જણાવ્યું હતું કે, “અમે જેલ ભરો આંદોલન કરવા તૈયાર છીએ.” તેમણે વધુમાં ચેતવણીના સ્વરમાં કહ્યું કે જો આદિવાસી ખેડૂતોના પ્રશ્નોનો ઉકેલ નહીં આવે તો “હવે અહિંસાનો માર્ગ બંધ કરી ઉગ્ર આંદોલન કરીશું.”
સાગબારા જંગલ જમીન મુદ્દે સરકાર અને આદિવાસી ખેડૂતો વચ્ચેનો વિવાદ વધુ તીવ્ર બની રહ્યો છે ત્યારે અનંત પટેલના આ નિવેદનથી આંદોલનને લઈને રાજકીય ગરમાવો વધ્યો છે.
