શ્રોત: ગ્રામિણ ટુડે ન્યુઝ, 24×7 વેબ પોર્ટલ
જંગલ જમીન મુદ્દે શંકરસિંહ વાઘેલા આક્રમકઃ “આ સરકાર નકામી છે, એને બદલી કાઢો”
આદિવાસી હક માટે વાઘેલાનો હુંકારઃ “આંદોલન નહીં, હવે સરકાર બદલો”
સર્જન વસાવા, ડેડિયાપાડા: જંગલ જમીન પર ખેડાણના હકને લઈને ચાલી રહેલા આદિવાસી ખેડૂતોના પ્રશ્ને પૂર્વ મુખ્યમંત્રી શંકરસિંહ વાઘેલાએ સરકાર સામે આક્રમક વલણ અપનાવ્યું છે. વાઘેલાએ આદિવાસીઓને માત્ર આંદોલન પૂરતું સીમિત ન રહેતા સરકાર બદલવા માટે એકજૂથ થવાની હાકલ કરી છે.
વાઘેલાએ જંગલ જમીનના સાચા માલિક આદિવાસીઓ હોવાનો દાવો કરતાં જણાવ્યું કે વર્ષોથી આદિવાસી સમાજ પોતાના હક અને અધિકારો માટે સંઘર્ષ કરી રહ્યો છે. તેમણે બળદગાડા સાથે ગાંધીનગર પહોંચીને મોટું આંદોલન કરવાની પણ હાકલ કરી છે.
પૂર્વ મુખ્યમંત્રીએ સરકાર પર નિશાન સાધતા કડક શબ્દોમાં કહ્યું કે, “આ સરકાર નકામી છે, એને બદલી કાઢો.” તેમણે આદિવાસી સમાજને પોતાના હક માટે સંગઠિત થવા અને સરકાર સામે લોકશાહી માર્ગે મજબૂત લડત આપવા અપીલ કરી હતી.
આ ઉપરાંત અલગ ભીલિસ્તાન રાજ્યની માંગને પણ શંકરસિંહ વાઘેલાએ જાહેર સમર્થન આપ્યું હોવાનું સામે આવ્યું છે. તેમણે જણાવ્યું કે, “આદિવાસીઓ ભીલિસ્તાન બનાવે તો મારું પૂરું સમર્થન છે.”
વાઘેલાએ આદિવાસી સમાજ દેશ અને ગુજરાતમાં સૌથી વધુ પીડિત વર્ગોમાંનો એક હોવાનો દાવો કર્યો હતો. અનામતના મુદ્દે પણ તેમણે દિલ્હી અને ગાંધીનગરમાં બેઠેલા લોકો સામે આક્ષેપ કરતાં કહ્યું કે અનામત કોઈની મહેરબાનીથી મળી નથી, પરંતુ વર્ષોના અન્યાય બાદ આદિવાસી, દલિત અને પછાત સમાજને તેનો અધિકાર મળ્યો છે.
તેમણે વધુમાં ST, SC અને OBC સમાજને ગુજરાતનો માલિક ગણાવતા તેમના હકો અને અધિકારોની રક્ષા માટે એકતાની જરૂરિયાત પર ભાર મૂક્યો હતો.
જંગલ જમીન, આદિવાસી અધિકાર, અનામત અને ભીલિસ્તાન જેવા મુદ્દાઓને લઈને શંકરસિંહ વાઘેલાના આ નિવેદનથી રાજકીય ચર્ચા ફરી તેજ બનવાની શક્યતા છે.
