વાંસદામાં રાષ્ટ્રીય સ્વયંસેવક સંઘ દ્રારા યુવા શક્તિ સંગમ યોજાયો, સમાજ અને રાષ્ટ્ર પ્રત્યેની જવાબદારી પર સંવાદ:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
વાંસદામાં રાષ્ટ્રીય સ્વયંસેવક સંઘ દ્રારા યુવા શક્તિ સંગમ યોજાયો, સમાજ અને રાષ્ટ્ર પ્રત્યેની જવાબદારી પર સંવાદ:
કમલેશ ગાંવિત, વાંસદા: રાષ્ટ્રીય સ્વયંસેવક સંઘ, વાંસદા તાલુકા દ્વારા પ્રતાપ હાઈસ્કૂલ સાંસ્કૃતિક ભવન ખાતે રવિવારના રોજ “યુવા શક્તિ સંગમ” કાર્યક્રમનું આયોજન કરવામાં આવ્યું હતું. કાર્યક્રમમાં વાંસદા તાલુકાના વિવિધ ગામો તેમજ વાંસદા નગરમાંથી મોટી સંખ્યામાં 18થી 35 વર્ષની વયના યુવાનો ઉપસ્થિત રહ્યા હતા. ભાઈઓ અને બહેનો મળી કુલ 168 યુવાનોએ કાર્યક્રમમાં ઉત્સાહપૂર્વક ભાગ લીધો હતો.
કાર્યક્રમની શરૂઆત સંઘની એક કલાકની શાખાથી કરવામાં આવી હતી. ત્યારબાદ યુવાનો સાથે સંવાદ સત્રનું આયોજન કરવામાં આવ્યું હતું. આ સત્ર દરમિયાન જિલ્લા સહ કાર્યવાહ જયેશભાઈ પુરોહિત તથા વિભાગ સહ કાર્યવાહ બાલકૃષ્ણભાઈ દ્વારા અલગ-અલગ સત્રો લેવામાં આવ્યા હતા. જેમાં યુવાનોની ભૂમિકા, સમાજ પ્રત્યેની જવાબદારી, સંગઠન શક્તિ અને રાષ્ટ્ર નિર્માણમાં યુવાનોના યોગદાન સહિતના વિવિધ વિષયો પર ચર્ચા કરવામાં આવી હતી.
સમાપન સત્રમાં તાલુકા કાર્યવાહ ભાવેશભાઈ, બાલકૃષ્ણભાઈ, જયેશભાઈ તેમજ એડવોકેટ અને નોટરી હંસાબેન ઉપસ્થિત રહ્યા હતા.
યુવાનોમાં રાષ્ટ્રભક્તિની ભાવના વધુ પ્રબળ બને, સમાજ સંગઠિત બને તેમજ યુવાનોમાં સમાજ અને રાષ્ટ્ર પ્રત્યેની જવાબદારીની ભાવના વિકસે તેવા હેતુથી આ કાર્યક્રમનું આયોજન કરવામાં આવ્યું હોવાનું આયોજકો દ્વારા જણાવાયું હતું.
કાર્યક્રમમાં તાલુકાના વિવિધ મંડળો અને ગામોમાંથી તેમજ વાંસદા નગરના યુવાનો મોટી સંખ્યામાં જોડાતા સમગ્ર કાર્યક્રમમાં ઉત્સાહ અને સંગઠનભાવ જોવા મળ્યો હતો.
રાષ્ટ્ર નિર્માણના કાર્યમાં યુવાનોની સક્રિય ભાગીદારી વધે અને સમાજને સંગઠિત બનાવી રાષ્ટ્રને પ્રગતિના ઉચ્ચ શિખર પર લઈ જવામાં સૌ પોતાનું યોગદાન આપે તેવો સંદેશ આ યુવા શક્તિ સંગમ દ્વારા આપવામાં આવ્યો હતો.
