આદિવાસી લોકકળાથી આત્મનિર્ભરતા તરફ: વાલિયાની કોલેજમાં ‘વારલી પેઈન્ટિંગ’ પર વિશેષ વર્કશોપ યોજાયો
શ્રોત: ગ્રામિણ ટુડે ન્યુઝ, 24×7 વેબ પોર્ટલ
આદિવાસી લોકકળાથી આત્મનિર્ભરતા તરફ: વાલિયાની કોલેજમાં ‘વારલી પેઈન્ટિંગ’ પર વિશેષ વર્કશોપ યોજાયો
શ્રી રંગ નવચેતન મહિલા આર્ટસ કોલેજ ખાતે કલા, સંસ્કૃતિ અને રોજગાર વિષય પર પ્રેરણાદાયી આયોજન: સ્નેહા વસાવાએ આપ્યું માર્ગદર્શન
સર્જન વસાવા, ડેડિયાપાડા: કલા માત્ર અભિવ્યક્તિનું માધ્યમ નથી, પરંતુ સંસ્કૃતિની ઓળખ અને આત્મનિર્ભરતાનો સબળ માર્ગ પણ બની શકે છે. આ જ ઉદ્દેશ્ય સાથે શ્રી રંગ નવચેતન મહિલા આર્ટસ કોલેજ, વાલિયા ખાતે ‘વારલી પેઈન્ટિંગ: કલા, સંસ્કૃતિ અને રોજગાર’ વિષય પર એક ખાસ માર્ગદર્શન કાર્યક્રમ યોજાયો હતો. આ કાર્યક્રમનું આયોજન Department of Economics, સીએસટી તથા SC/ST Cellના સંયુક્ત ઉપક્રમે કરવામાં આવ્યું હતું, જેનો મુખ્ય હેતુ આદિવાસી સમાજની સમૃદ્ધ વિરાસતને ઉજાગર કરી વિદ્યાર્થીનીઓને સ્વરોજગારી તરફ વાળવાનો હતો.
આ પ્રસંગે મુખ્ય માર્ગદર્શક તરીકે ઉપસ્થિત રહેલા વિદ્યાર્થી કુ.સ્નેહા વસાવાએ વારલી પેઈન્ટિંગ ક્ષેત્રે પોતાની સફર અને અનુભવો રજૂ કર્યા હતા. સ્નેહા પોતે આ પરંપરાગત આદિવાસી કળાના માધ્યમથી પોતાની ઓળખ બનાવવાની સાથે સફળતાપૂર્વક રોજગાર પણ મેળવી રહી છે, જે કોલેજની અન્ય વિદ્યાર્થીનીઓ માટે આત્મનિર્ભરતાનું ઉત્તમ ઉદાહરણ પૂરૂં પાડે છે. તેમણે વિદ્યાર્થીનીઓને વારલી આર્ટની વિવિધ તકનીકો, કેન્વાસ પરની દોરવાની શૈલી અને આજના આધુનિક ફેશન તથા ગૃહસુશોભન (Home Decor) સેક્ટરમાં તેની વ્યાપક માંગ વિશે વિસ્તૃત માર્ગદર્શન પૂરું પાડ્યું હતું.
કાર્યક્રમ દરમિયાન 18 ઓગસ્ટ “World Never Give Up Day” નો વિશેષ ઉલ્લેખ કરવામાં આવ્યો હતો. ઉપસ્થિત મહાનુભાવોએ જણાવ્યું હતું કે સતત પ્રયત્નો, મહેનત અને કળા પ્રત્યેના સમર્પણથી કોઈ પણ પડકારને પાર કરી સફળતા મેળવી શકાય છે. સ્નેહા વસાવાની આ મહેનત અને કલાત્મક ક્ષમતાને સૌએ મુક્ત મનથી બિરદાવી હતી.
આ વર્કશોપમાં કોલેજના આચાર્યશ્રી, અધ્યાપકગણ અને મોટી સંખ્યામાં વિદ્યાર્થીનીઓએ ઉત્સાહભેર ભાગ લીધો હતો. વિદ્યાર્થીનીઓએ પ્રાચીન કલાના વ્યવહારિક પ્રયોગો શીખીને સંસ્કૃતિનું જતન કરવાની સાથે સ્વરોજગારી મેળવવાનો દ્રઢ સંકલ્પ વ્યક્ત કર્યો હતો. અંતમાં, આયોજકો દ્વારા કલા અને આત્મનિર્ભરતાનો સુંદર સંદેશ આપનાર કુ. સ્નેહા વસાવા અને સહયોગીઓનો આભાર વ્યક્ત કરવામાં આવ્યો હતો.
