ભરૂચમાં ‘લાંચિયા’ અધિકારીઓ પર ACBનો પ્રહાર: ફૂડ એન્ડ ડ્રગ્સ વિભાગના બે અધિકારી રૂ.૪૦ હજાર લેતા રંગેહાથ ઝડપાયા
શ્રોત: ગ્રામિણ ટુડે ન્યુઝ, 24×7 વેબ પોર્ટલ
ભરૂચમાં ‘લાંચિયા’ અધિકારીઓ પર ACBનો પ્રહાર: ફૂડ એન્ડ ડ્રગ્સ વિભાગના બે અધિકારી રૂ.૪૦ હજાર લેતા રંગેહાથ ઝડપાયા
દવાના લાઇસન્સના નામે લાંચનો ખેલ! રૂ.૪૦ હજાર લેતા ફૂડ એન્ડ ડ્રગ્સના બે અધિકારી ACBના હાથે ઝડપાયા
સર્જન વસાવા, ડેડિયાપાડા: ભરૂચમાં ભ્રષ્ટાચાર વિરોધી બ્યુરો (ACB)ની કાર્યવાહીમાં ફૂડ એન્ડ ડ્રગ્સ વિભાગના બે અધિકારીઓ લાંચ લેતા રંગેહાથ ઝડપાતા ચકચાર મચી ગઈ છે. દવાના હોલસેલ લાઇસન્સની કામગીરી માટે રૂ.૫૦ હજારની લાંચ માંગવામાં આવી હોવાની ફરિયાદના આધારે નર્મદા ACB દ્વારા ટ્રેપ ગોઠવવામાં આવી હતી.
મળતી માહિતી મુજબ, ફરિયાદના આધારે નર્મદા ACBની ટીમે કાર્યવાહી હાથ ધરી હતી. ટ્રેપ દરમિયાન ફૂડ એન્ડ ડ્રગ્સ વિભાગના મદદનીશ કમિશનર પ્રકાશભાઈ પોસના તેમજ ડ્રગ્સ ઇન્સ્પેક્ટર સુરભીબેન દેસાઈ રૂ.૪૦ હજારની લાંચ સ્વીકારતા ઝડપાયા હોવાનું સામે આવ્યું છે.
દવાના હોલસેલ લાઇસન્સની કામગીરીના બદલામાં લાંચની માંગણી કરવામાં આવી હોવાનો આક્ષેપ છે. નક્કી કરેલી રકમ પૈકી રૂ.૪૦ હજાર સ્વીકારવામાં આવી રહ્યા હતા, તે દરમિયાન નર્મદા ACBની ટીમે બંને અધિકારીઓને રંગેહાથ ઝડપી પાડ્યા હતા.
આ કાર્યવાહી નર્મદા ACBના પોલીસ ઇન્સ્પેક્ટર ડી.ડી. વસાવા અને તેમની ટીમ દ્વારા કરવામાં આવી હોવાનું જાણવા મળ્યું છે. ટ્રેપ બાદ બંને અધિકારીઓ સામે કાયદેસરની કાર્યવાહી હાથ ધરવામાં આવી છે.
ફૂડ એન્ડ ડ્રગ્સ જેવા મહત્વના સરકારી વિભાગના અધિકારીઓ લાંચના કેસમાં ACBની ટ્રેપમાં ઝડપાતા સમગ્ર વિભાગમાં ભારે ચર્ચા જાગી છે. ખાસ કરીને દવાના હોલસેલ લાઇસન્સ જેવી મહત્વપૂર્ણ મંજૂરી માટે લાંચની માંગણી કરવામાં આવી હોવાના આક્ષેપને કારણે મામલો વધુ ગંભીર બન્યો છે.
હાલ નર્મદા ACB દ્વારા સમગ્ર મામલે વધુ તપાસ હાથ ધરવામાં આવી રહી છે. લાંચની માંગણી પાછળના સંજોગો, આ મામલે અન્ય કોઈ વ્યક્તિની સંડોવણી છે કે કેમ તેમજ અગાઉ પણ આવી કોઈ લેવડદેવડ થઈ હતી કે કેમ તે સહિતના મુદ્દાઓની તપાસ કરવામાં આવી રહી છે.
