આશ્રમ શાળા સામરપાડાની દીકરીઓએ SGFIમાં રચ્યો ઇતિહાસ, જિલ્લા કક્ષાએ પ્રથમ સ્થાન મેળવી રાજ્ય કક્ષાએ પ્રવેશ:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
આશ્રમ શાળા સામરપાડાની દીકરીઓએ SGFIમાં રચ્યો ઇતિહાસ, જિલ્લા કક્ષાએ પ્રથમ સ્થાન મેળવી રાજ્ય કક્ષાએ પ્રવેશ:
સર્જન વસાવા, ડેડિયાપાડા: હળપતિ સેવા સંઘ, બારડોલી સંચાલિત આશ્રમ શાળા સામરપાડા (તા. ડેડિયાપાડા, જી. નર્મદા)ની વિદ્યાર્થીનીઓએ સ્કૂલ ગેમ્સ ફેડરેશન ઓફ ઈન્ડિયા (SGFI)-2026 અંતર્ગત યોજાયેલી જિલ્લા કક્ષાની શાળાકીય એથલેટિક્સ સ્પર્ધામાં શાનદાર પ્રદર્શન કરી શાળા અને સમગ્ર વિસ્તારનું નામ રોશન કર્યું છે.
સ્પર્ધામાં શાળાની વિદ્યાર્થીની સુનંદાબેન વસાવાએ 600 મીટર દોડમાં પ્રથમ સ્થાન, જ્યારે અક્ષનાબેન વસાવાએ ચક્ર ફેંક (ડિસ્કસ થ્રો)માં પ્રથમ સ્થાન મેળવી નોંધપાત્ર સિદ્ધિ હાંસલ કરી છે. બંને ખેલાડીઓ હવે રાજ્ય કક્ષાની સ્પર્ધામાં નર્મદા જિલ્લાનું પ્રતિનિધિત્વ કરશે.
આશ્રમ શાળા સામરપાડાના ઇતિહાસમાં પ્રથમ વખત શાળાની દીકરીઓ રાજ્ય કક્ષાની રમતગમત સ્પર્ધામાં પ્રતિનિધિત્વ કરવા જઈ રહી હોવાથી આ સિદ્ધિને ઐતિહાસિક ગણવામાં આવી રહી છે.
વિજેતા વિદ્યાર્થીનીઓ શાળા પરત ફરતાં જ મુખ્ય ગેટ પર વિદ્યાર્થીઓ અને શિક્ષકો દ્વારા તેમનું ઉત્સાહભેર સ્વાગત કરવામાં આવ્યું હતું. ઢોલ-નગારાના તાલ સાથે શાળા પરિવાર દ્વારા નાચી-ગાઈને ભવ્ય ઉજવણી કરવામાં આવી હતી. સમગ્ર શાળા પરિસર ‘દીકરીઓની સિદ્ધિ’ના ગૌરવથી ગુંજી ઊઠ્યું હતું.
આ ગૌરવપૂર્ણ સિદ્ધિ બદલ શાળાના આચાર્યશ્રી, સ્ટાફ પરિવાર તેમજ સંસ્થાના પ્રમુખશ્રી અને મંત્રીશ્રીએ બંને વિદ્યાર્થીનીઓને હૃદયપૂર્વક અભિનંદન પાઠવી આગામી રાજ્ય કક્ષાની સ્પર્ધા માટે શુભેચ્છાઓ પાઠવી હતી.
મદદનીશ કમિશનર (નર્મદા) શ્રી હાર્દિકભાઈ રાઠોડે પણ બંને વિજેતા ખેલાડીઓને વિશેષ અભિનંદન પાઠવી રાજ્ય કક્ષાની સ્પર્ધા માટે જરૂરી તમામ પ્રકારની મદદ અને સહયોગ આપવાની ખાતરી આપી હતી.
આદિવાસી વિસ્તારની આશ્રમ શાળાની દીકરીઓએ રમતગમત ક્ષેત્રે મેળવેલી આ સિદ્ધિ અન્ય વિદ્યાર્થીઓ માટે પણ પ્રેરણારૂપ બની છે. હવે બંને ખેલાડીઓ રાજ્ય કક્ષાએ પણ શ્રેષ્ઠ પ્રદર્શન કરી શાળા અને નર્મદા જિલ્લાનું નામ વધુ ગૌરવથી ઊંચું કરે તેવી સૌને આશા છે.
