પી.એમ. શ્રી થવા બ્રાંચ પ્રાથમિક શાળાનું ગૌરવ: શિક્ષક વસાવા સતિષભાઈ ‘પ્રતિભાશાળી શિક્ષક’ તરીકે સન્માનિત

શ્રોત: ગ્રામિણ ટુડે ન્યુઝ, 24×7 વેબ પોર્ટલ

પી.એમ. શ્રી થવા બ્રાંચ પ્રાથમિક શાળાનું ગૌરવ: શિક્ષક વસાવા સતિષભાઈ ‘પ્રતિભાશાળી શિક્ષક’ તરીકે સન્માનિત

ગણિત-વિજ્ઞાન વિષયમાં ઉત્તમ કામગીરી બદલ શિક્ષક વસાવા સતિષભાઈ સિંગાભાઈનું સન્માન:

સર્જન વસાવા, ડેડિયાપાડા: પી.એમ. શ્રી થવા બ્રાંચ પ્રાથમિક શાળાના શિક્ષક વસાવા સતિષભાઈ સિંગાભાઈને શૈક્ષણિક ક્ષેત્રે ઉત્કૃષ્ટ કામગીરી બદલ ‘પ્રતિભાશાળી શિક્ષક’ તરીકે સન્માનિત કરવામાં આવ્યા છે.

શિક્ષણ વિભાગ, ગુજરાત રાજ્ય દ્વારા શૈક્ષણિક વર્ષ 2025-26 દરમિયાન શાળામાં ઉત્તમ શૈક્ષણિક કાર્ય, શાળાકીય સહઅભ્યાસિક પ્રવૃત્તિઓ, નવીન પ્રયોગો તેમજ સામાજિક ક્ષેત્રે ઉત્સાહપૂર્વક સક્રિય યોગદાન બદલ પ્રતિભાશાળી શિક્ષક પ્રમાણપત્ર એનાયત કરવામાં આવ્યું છે.

પી.એમ. શ્રી થવા બ્રાંચ પ્રાથમિક શાળા ખાતે ફરજ બજાવતા શિક્ષક વસાવા સતિષભાઈ સિંગાભાઈએ ખાસ કરીને ગણિત અને વિજ્ઞાન વિષયમાં ઉત્તમ કામગીરી સાથે વિદ્યાર્થીઓને યોગ્ય માર્ગદર્શન આપ્યું હતું. તેમના માર્ગદર્શન હેઠળ વિદ્યાર્થીઓએ બાહ્ય પરીક્ષાઓમાં પણ ઉત્કૃષ્ટ પરિણામ પ્રાપ્ત કરી શાળાનું ગૌરવ વધાર્યું છે.

વિદ્યાર્થીઓમાં વિષય પ્રત્યે રસ વધે અને તેમની શૈક્ષણિક ક્ષમતાનો સર્વાંગી વિકાસ થાય તે માટે શિક્ષક દ્વારા સતત નવીન પદ્ધતિઓ અને અસરકારક શૈક્ષણિક પ્રવૃત્તિઓ હાથ ધરવામાં આવી રહી છે.

આ ઉત્કૃષ્ટ કામગીરીની નોંધ લઈ ગુજરાત રાજ્યના શિક્ષણ વિભાગ દ્વારા તેમને ‘પ્રતિભાશાળી શિક્ષક પ્રમાણપત્ર’ એનાયત કરી અભિનંદન પાઠવવામાં આવ્યા છે. શિક્ષક વસાવા સતિષભાઈની આ સિદ્ધિને શાળા પરિવાર, વિદ્યાર્થીઓ તથા સમગ્ર શિક્ષણ જગત માટે ગૌરવપૂર્ણ સિદ્ધિ તરીકે આવકારવામાં આવી રહી છે.