કર્ણાટકની જ્વેલરી ચોરી બાદ ફરાર આંતરરાજ્ય ગેંગને નેત્રંગ પોલીસે દબોચી લીધી, રૂ.6.55 લાખનો મુદ્દામાલ જપ્ત:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
કર્ણાટકની જ્વેલરી ચોરી બાદ ફરાર આંતરરાજ્ય ગેંગને નેત્રંગ પોલીસે દબોચી લીધી, રૂ.6.55 લાખનો મુદ્દામાલ જપ્ત:
ચોરી કરી MP નંબરની કારમાં ભાગતા ચોરોનો ખેલ ખતમ, નેત્રંગ પોલીસના હાથે 3 આરોપી ઝડપાયા
સર્જન વસાવા, ડેડિયાપાડા: નેત્રંગ પોલીસ સ્ટેશનની ટીમે વાહન ચેકિંગ દરમિયાન કર્ણાટક રાજ્યના કિટ્ટુર ખાતે જ્વેલરી શોપમાં ચોરી કરી ફરાર થયેલી અને રાજસ્થાન સહિતના વિવિધ રાજ્યોમાં અનેક ગુનાઓમાં સંડોવાયેલી આંતરરાજ્ય ટોળકીને ઝડપી પાડવામાં સફળતા મેળવી છે.
પ્રાપ્ત માહિતી મુજબ, તા. 14 ઓગસ્ટ 2026ના રોજ પોલીસ ઈન્સ્પેક્ટર શ્રી વી.એસ. વણઝારા સહિતની ટીમ વાહન ચેકિંગમાં હતી. દરમિયાન ડેડિયાપાડા તરફથી એક સફેદ રંગની હ્યુન્ડાઈ કંપનીની i20 કાર નંબર MP.05.CB.3246 આવતા પોલીસે તેને રોકવાનો પ્રયાસ કર્યો હતો. જોકે કારચાલકે વાહન રોકવાને બદલે ઝડપથી આગળ વધારી દીધું હતું.
પોલીસે તાત્કાલિક પીછો કરતાં કાર થોડે અંતરે ઓવરટેક કરી રોકવામાં આવી હતી. કારમાં સવાર ત્રણેય શખ્સોને ઝડપી લઈ તેમની પૂછપરછ કરવામાં આવી હતી. વધુ તપાસ દરમિયાન આરોપીઓએ કર્ણાટક રાજ્યના કિટ્ટુર ખાતે જ્વેલરીની દુકાન માંથી ચોરી કરી હોવાની કબૂલાત કરી હોવાનું પોલીસ દ્વારા જણાવાયું છે.
આરોપીઓ પાસેથી ચાંદી તથા ચાંદી જેવી દેખાતી જર્મન ધાતુના વિવિધ પ્રકારના ઘરેણાં, ભગવાનની નાની-મોટી મૂર્તિઓ, દિવાલની ઘંટડીઓ, પાત્રો વગેરે મળી રૂ. 1.20 લાખનો મુદ્દામાલ, હ્યુન્ડાઈ i20 કાર કિંમત રૂ. 5 લાખ તથા મોબાઈલ ફોન કિંમત રૂ. 35 હજાર મળી કુલ રૂ. 6.55 લાખનો મુદ્દામાલ કબજે કરવામાં આવ્યો છે.
પોલીસે ઝડપાયેલા આરોપીઓની ઓળખ દિલીપસિંઘ ઉર્ફે દેવીસિંધ લાલસિંધ જાતે રાવત, નારસિંધ ઉર્ફે પવન જેન્તુસિંધ તેજસિંધ જાતે રાવત અને અર્જુનસિંઘ ઉર્ફે શિવસિંહ એકલિંગસિંહ જાતે રાઠોડ તરીકે કરી છે. ત્રણેય રાજસ્થાનના રહેવાસી હોવાનું પોલીસ તપાસમાં સામે આવ્યું છે.
પોલીસના જણાવ્યા મુજબ, મુખ્ય આરોપી દિલીપસિંહ વિરુદ્ધ રાજસ્થાન તથા મધ્યપ્રદેશમાં IPC અને NDPS એક્ટ હેઠળ અગાઉના અનેક ગુનાઓ નોંધાયેલા છે અને તે રાજસ્થાનની જેલમાં પણ સજા ભોગવી ચૂક્યો હોવાનું સામે આવ્યું છે. અન્ય આરોપીઓ સામે પણ રાજસ્થાન તથા મધ્યપ્રદેશમાં અગાઉ NDPS સહિતના ગુનાઓ નોંધાયેલા હોવાનું તપાસમાં બહાર આવ્યું છે.
આ સમગ્ર કામગીરીમાં પોલીસ અધિકારીઓ તથા કર્મચારીઓની ટીમે મહત્વની ભૂમિકા ભજવી હતી. પોલીસે ઝડપાયેલા આરોપીઓ સામે કાયદેસરની કાર્યવાહી હાથ ધરી વધુ તપાસ શરૂ કરી છે. સાથે જ આ ટોળકી અન્ય રાજ્યોમાં કેટલા ગુનાઓમાં સંડોવાયેલી છે અને ચોરીનો અન્ય કેટલો મુદ્દામાલ મેળવવાનો બાકી છે તે અંગે પણ તપાસનો દોર આગળ ધપાવવામાં આવી રહ્યો છે.
