ઘાંટોલીમાં આડા સંબંધના વહેમમાં ચપ્પુથી જીવલેણ હુમલો, હત્યાના પ્રયાસનો ગુનો નોંધાયો:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
ઘાંટોલીમાં આડા સંબંધના વહેમમાં ચપ્પુથી જીવલેણ હુમલો, હત્યાના પ્રયાસનો ગુનો નોંધાયો:
પત્ની સાથે આડા સંબંધનો વહેમ, યુવક પર જીવલેણ હુમલો
સર્જન વસાવા: દેડીયાપાડા: નર્મદા જિલ્લાના દેડીયાપાડા તાલુકાના ઘાંટોલી ગામમાં આડા સંબંધનો વહેમ રાખી એક વ્યક્તિ પર ચપ્પુ વડે જીવલેણ હુમલો કરવામાં આવ્યો હોવાની ઘટના પ્રકાશમાં આવી છે. બનાવ અંગે તિલકવાડા પોલીસ મથકે હત્યાના પ્રયાસ સહિતનો ગુનો નોંધાઈ વધુ તપાસ હાથ ધરવામાં આવી છે.
પોલીસ ફરિયાદ મુજબ, ઘાંટોલી નિશાળ ફળિયામાં રહેતા પ્રકાશભાઈ પાંડીયાભાઈ વસાવા (ઉ.વ. ૩૫)એ નોંધાવેલી ફરિયાદમાં જણાવ્યું છે કે ઘાંટોલી નવા ફળિયામાં રહેતા આશિકભાઈ ઉદેસિંગભાઈ વસાવાને ફરિયાદી અને પોતાની પત્ની અર્ચનાબેન વચ્ચે આડા સંબંધ હોવાનો વહેમ હતો. આ બાબતે આરોપી અગાઉ પણ અનેક વખત ફરિયાદી સાથે ઝઘડો કરી ગાળો બોલતો તેમજ જાનથી મારી નાખવાની ધમકીઓ આપતો હતો.
ફરિયાદ મુજબ, આરોપી ફરિયાદીના ઘરે પહોંચ્યો હતો અને મારી નાખવાના ઇરાદે ચપ્પુ વડે હુમલો કર્યો હતો. હુમલામાં ફરિયાદીને ગળાના ભાગે ગંભીર અને જીવલેણ ઇજાઓ પહોંચતાં તેમને સારવાર માટે ખસેડવામાં આવ્યા હતા. આ બનાવ અંગે તિલકવાડા પોલીસે આશિકભાઈ ઉદેસિંગભાઈ વસાવા સામે ભારતીય ન્યાય સંહિતાની સંબંધિત કલમો હેઠળ હત્યાના પ્રયાસનો ગુનો નોંધ્યો છે. પોલીસે વધુ તપાસ શરૂ કરી છે.
