શ્રી યમ એમ.પી.કાપડિયા વિદ્યામંદિરના વિદ્યાર્થીઓ તાલુકા કક્ષાએ ચમક્યા, હવે જિલ્લા કક્ષાએ કરશે પ્રતિનિધિત્વ:
શ્રોત: ગ્રામિણ ટુડે ન્યુઝ, ૨૪x૭ વેબ પોર્ટલ
શ્રી યમ એમ.પી.કાપડિયા વિદ્યામંદિરના વિદ્યાર્થીઓ તાલુકા કક્ષાએ ચમક્યા, હવે જિલ્લા કક્ષાએ કરશે પ્રતિનિધિત્વ:
કમલેશ ગાંવિત, વાંસદા: વાંસદા તાલુકાના કુરેલિયા ખાતે આજે તાલુકા કક્ષાનો શાળાકીય રમતોત્સવ યોજાયો હતો. આ રમતોત્સવમાં તાલુકાની વિવિધ શાળાઓના વિદ્યાર્થીઓએ ઉત્સાહભેર ભાગ લીધો હતો. જેમાં ભારત સેવાશ્રમ સંઘ, ગંગપુર સંચાલિત શ્રી યમ એમ. પી. કાપડિયા વિદ્યામંદિર, ગંગપુરના વિદ્યાર્થીઓએ વિવિધ રમતોમાં શાનદાર પ્રદર્શન કરીને અનેક પ્રથમ ક્રમ હાંસલ કર્યા હતા.
સ્પર્ધામાં અંડર-17 વિભાગમાં ખોખો સ્પર્ધામાં ભાઈઓની ટીમ તેમજ બહેનોની ટીમે પ્રથમ સ્થાન પ્રાપ્ત કર્યું હતું. ઉપરાંત, 3000 મીટર દોડમાં કુંવર હિમેશભાઈ પ્રથમ ક્રમે વિજેતા બન્યા હતા, જ્યારે ચક્રફેક સ્પર્ધામાં ધૂડીયા વિશાલભાઈએ પ્રથમ સ્થાન મેળવી શાળાનું ગૌરવ વધાર્યું હતું.
તાલુકા કક્ષાએ વિજેતા બનેલા આ તમામ વિદ્યાર્થીઓ હવે ખારેલ તેમજ નવસારી સ્થિત મદ્રેસા હાઈસ્કૂલ ખાતે યોજાનારી જિલ્લા કક્ષાની સ્પર્ધાઓમાં શાળા અને વાંસદા તાલુકાનું પ્રતિનિધિત્વ કરશે.
વિદ્યાર્થીઓની આ નોંધપાત્ર સિદ્ધિ બદલ સંસ્થાના મંત્રી સ્વામી વિશ્વારૂપાનંદજી મહારાજે આશીર્વાદ પાઠવ્યા હતા. સંસ્થાના પ્રોજેક્ટ ડાયરેક્ટર શ્રી નિમિષ વ્યાસે વડોદરાથી શુભેચ્છાઓ પાઠવી હતી.
શાળાના આચાર્ય શ્રી મણિલાલભાઈ પટેલ, પ્રાથમિક શાળાના આચાર્ય શ્રી હિંમત ચૌહાણ, શાળાના ડાયરેક્ટર શ્રી કિશોરભાઈ પટેલ તથા કેમ્પસ ડાયરેક્ટર શ્રી ભાવેશભાઈ પટેલે વિદ્યાર્થીઓને અભિનંદન પાઠવતાં જણાવ્યું હતું કે, વિદ્યાર્થીઓ જિલ્લા અને રાજ્ય કક્ષાએ પણ શ્રેષ્ઠ પ્રદર્શન કરીને શાળા તેમજ સંસ્થાનું નામ વધુ ગૌરવપૂર્ણ બનાવે તેવી શુભેચ્છાઓ છે.
વિદ્યાર્થીઓની આ સફળતા પાછળ શાળાના પી.ટી. શિક્ષક શ્રી ધનસુખ ગામીત તથા શ્રી બિપીનભાઈ પટેલની અથાગ મહેનત, યોગ્ય માર્ગદર્શન અને સતત તાલીમનું મહત્વપૂર્ણ યોગદાન રહ્યું હોવાનું શાળા પરિવારે જણાવ્યું હતું.
