તાપી જિલ્લામાં પ્રાકૃતિક ખેતીને પ્રોત્સાહન: ૪૦૦૦ ખેડૂતોએ મેળવ્યું ટેકનિકલ માર્ગદર્શન

શ્રોત: ગ્રામીણ‌ ટુડે ન્યુઝ, 24×7 વેબ‌ પોર્ટલ

તાપી જિલ્લામાં પ્રાકૃતિક ખેતીને પ્રોત્સાહન: ૪૦૦૦ ખેડૂતોએ મેળવ્યું ટેકનિકલ માર્ગદર્શન

વિકાસ સપ્તાહની ઉજવણી અંતર્ગત કૃષિ મહોત્સવના બીજા દિવસે ખેડૂતોએ મોડલ ફાર્મની મુલાકાત લીધી અને પ્રાકૃતિક ખેતીના તમામ આયામો જાણ્યા

તાપી: ગુજરાતના પનોતા પુત્ર અને યશસ્વી વડાપ્રધાન શ્રી નરેન્દ્રભાઈ મોદીના ગુજરાતના મુખ્યમંત્રી તરીકે શપથ લીધાના ૨૪ વર્ષ પૂર્ણ થવાના ઐતિહાસિક અવસર નિમિત્તે રાજ્યભરમાં ઉજવાઈ રહેલા “વિકાસ સપ્તાહ”ના ભાગરૂપે, તાપી જિલ્લામાં બે દિવસના “કૃષિ વિકાસ દિન”ની ઉત્સાહભેર ઉજવણી કરવામાં આવી. આ અંતર્ગત, જિલ્લાના તમામ ૮ તાલુકાઓમાં આશરે ૪૦૦૦ જેટલા ખેડૂતો માટે પ્રાકૃતિક ખેતી અંગેના વિશેષ કાર્યક્રમોનું આયોજન કરાયું હતું.

આ કાર્યક્રમનું મુખ્ય આકર્ષણ નવસારી કૃષિ યુનિવર્સિટીના નિષ્ણાતો દ્વારા આયોજિત ટેકનિકલ માર્ગદર્શન સેમિનાર રહ્યા હતા. આ સેમિનારોમાં ખેડૂતોને વૈજ્ઞાનિક ઢબે પ્રાકૃતિક ખેતી કરવાની પદ્ધતિઓ, જમીનની તંદુરસ્તીની જાળવણી અને ઓછા ખર્ચે વધુ ઉત્પાદન મેળવવા અંગેનું ઊંડાણપૂર્વકનું માર્ગદર્શન આપવામાં આવ્યું. આ સાથે જ, ખેડૂતોએ પ્રગતિશીલ ખેડૂતોના મોડેલ ફાર્મની મુલાકાત લઈ જીવામૃત, ઘનજીવામૃત અને પાક સંરક્ષણ માટેની કુદરતી પદ્ધતિઓનું જીવંત નિદર્શન પણ નિહાળ્યું.

ધારાસભ્યશ્રી ડૉ. જયરામભાઈ ગામીતે આ પહેલને બિરદાવતા કહ્યું, “આખા જિલ્લામાં એક સાથે ખેડૂતો માટે આવા પ્રેરણાદાયક અને માહિતીસભર કાર્યક્રમોનું આયોજન કરવું એ પ્રશંસનીય છે. પ્રાકૃતિક ખેતી જ ટકાઉ કૃષિ અને સમૃદ્ધ ખેડૂતનું ભવિષ્ય છે.”

આ કાર્યક્રમોને સફળ બનાવવા માટે તમામ ૮ તાલુકાના સ્થાનિક પદાધિકારીઓ, આગેવાનો અને કૃષિ વિભાગના અધિકારીઓએ જહેમત ઉઠાવી હતી.