ડાંગમાં પાણીના પોકાર વચ્ચે આહવાના સર્કિટ હાઉસ ખાતે પાણીની સમસ્યા નિવારણ માટે બેઠક મળી:
શ્રોત: ગ્રામીણ ટુડે ન્યુઝ, 24×7 વેબ પોર્ટલ
ડાંગમાં પાણીના પોકાર વચ્ચે આહવાના સર્કિટ હાઉસ ખાતે પાણીની સમસ્યા નિવારણ માટે બેઠક મળી:
પ્રજાજનોને સરળતાથી પાણી પૂરું પાડવાના પ્રયાસોમાં અધિકારી કે ઈજારદારની બેદરકારી બહાર આવશે તો તે સાંખી નહિ લેવાય: નાયબ મુખ્ય દંડક શ્રી વિજયભાઈ પટેલ
પ્રદિપ ગાંગુર્ડે, સાપુતારા : ડાંગ જેવા વિશિષ્ટ ભૌગોલિક વિસ્તારમાં વસતા પ્રજાજનોને પાણી જેવી પ્રાથમિક સુવિધાઓ સરળતાથી ઉપલબ્ધ થાય તે માટે સતત ચિંતિત અને પ્રયાસરત રાજ્ય અને કેન્દ્ર સરકારના ઉદ્દેશની પૂર્તિમાં જો કોઈ અધિકારી કે ઈજારદારની બેદરકારી બહાર આવશે તો તે સાંખી નહિ લેવાય, તેમ ગુજરાત વિધાનસભાના નાયબ મુખ્ય દંડક શ્રી વિજયભાઈ પટેલે સ્પષ્ટપણે જણાવ્યું હતું.
આહવાના સર્કિટ હાઉસ ખાતે યોજાયેલી એક આપાતકાલિન બેઠકમાં જિલ્લાના જળ સંપત્તિ અને પાણી પુરવઠા વિભાગના અધિકારીઓ સાથે સૂક્ષ્મ સમિક્ષા કરતા નાયબ મુખ્ય દંડકશ્રીએ, ખાસ કરીને પીવાના પાણીની સમસ્યાના નિવારણ માટે સૌ સંવેદનશીલ બને તે ખૂબ જરૂરી છે તેમ કહ્યું હતું.
ગ્રામ્ય કક્ષાએ અમલી પાણી પુરવઠા યોજનાઓ માટેની અમલીકરણ એજન્સી અને તેનું સંચાલન કરતી પાણી સમિતિઓ વચ્ચે સંકલનના અભાવે પ્રજાજનોને પાણીની મુશ્કેલી ન અનુભવવી પડે તેનું ધ્યાન રાખવાની તાકીદ કરતાં શ્રી વિજયભાઈ પટેલે જિલ્લાના મુખ્ય વહીવટી મથક આહવા સહિત ત્રણેય તાલુકાઓ અને ગ્રામ્ય વિસ્તારોમાં આગામી ચોમાસા સુધી પાણી પહોંચાડવાના આયોજનની જાણકારી મેળવી ઉપયોગી સૂચનો કર્યા હતા.
પાણી જેવા પ્રાણ પ્રશ્ને પાણી પુરવઠા, વાસ્મો, યાંત્રિક વિભાગ, સિંચાઈ જેવા વિભાગોના અધિકારીઓએ સ્થાનિક પદાધિકારીઓ સાથે સંકલન કેળવી, પાણીના વ્યય સામે પણ સાવચેતી કેળવવાની સૂચના આપી હતી. પાણીના એક એક ટીપાનો સદઉપયોગ થાય તે સુનિશ્ચિત કરવા સાથે પાઈપ લાઈનોના ભંગાણો, સંબંધિત ઈજારદાર સાથે મળી સત્વરે દૂરસ્ત કરવાની દરકાર લેવા પણ નાયબ મુખ્ય દંડકશ્રીએ સૂચના આપી હતી.
જિલ્લામાં અમલી જુદી જુદી પાણી પુરવઠા યોજનાઓની વિસ્તૃત જાણકારી મેળવતા નાયબ મુખ્ય દંડક અને ધારાસભ્ય શ્રી વિજયભાઈ પટેલે, યોજનાથી વંચિત ગામોને પણ પાણીની સુવિધાઓ સુપેરે પહોંચે તે જોવાની તાકીદ કરી હતી. જિલ્લામાં હયાત કુવા, બોર, ચેકડેમ, નદી નાળા સહિતના ઉપલબ્ધ સ્ત્રોત વિગેરેની જાણકારી મેળવી શ્રી પટેલે પાણી માટેની સંખ્યાબંધ યોજનાઓનું સુચારુ સંયોજન કરીને, છેવાડાના માનવી સુધી પાણી પહોંચાડવાના પવિત્ર કાર્યમાં સૌને આહુતી આપવાની હિમાયત કરી હતી.
પાણીની સમસ્યાના કાયમી નિરાકરણ માટે અમલી લાંબાગાળાની યોજનાઓની પ્રગતિની સમિક્ષા પણ નાયબ મુખ્ય દંડક અને ધારાસભ્ય શ્રી વિજયભાઈ પટેલે આ વેળા હાથ ધરી હતી.
બેઠકમા નાયબ મુખ્ય દંડક શ્રી વિજયભાઈ પટેલ સાથે ગુજરાત પ્રદેશ આદિજાતિ મોરચાના મંત્રી શ્રી સુભાષભાઈ ગાઈન, સહિત આહવા, વઘઈ, અને સુબિર તાલુકા પંચાયતોના પ્રમુખશ્રીઓ સર્વશ્રી સુરેશભાઈ ચૌધરી, ચંદરભાઈ ગાવિત, અને રવિનાબેન ગાવિત, સંગઠનના હોદ્દેદારો, પાણી સાથે સંકળાયેલા જુદા જુદા વિભાગના અધિકારી/કર્મચારીઓ વિગેરેએ ઉપસ્થિત રહી ચર્ચામાં ભાગ લીધો હતો.
