વ્યારા તાલુકાનો ઐતિહાસિક ડોસવાડા ડેમ તેની મહત્તમ સપાટી વટાવીને સંપૂર્ણ ભરાયો:

શ્રોત: ગ્રામીણ ટુડે ન્યુઝ, 24×7 વેબ પોર્ટલ

ચોમાસાની ચાલુ સીઝનમાં તાપી જિલ્લામાં નોંધાયેલા સતત વરસાદના પરિણામે વ્યારા તાલુકાનો ઐતિહાસિક ડોસવાડા ડેમ તેની મહત્તમ સપાટી વટાવીને સંપૂર્ણ ભરાઈ ચૂક્યો છે.

ડોસવાડા ડેમ છલોછલ ભરાઈ જતાં, ઓવરફ્લો થતાં વહીવટી તંત્ર દ્વારા નદી કિનારાના નીચાણવાળા વિસ્તારોને એલર્ટ કરાયા હતા

જિલ્લા આપત્તિ વ્યવસ્થાપન તંત્ર તરફથી મળતી સત્તાવાર માહિતી અનુસાર, તા. ૦૯ જુલાઈ, ૨૦૨૬ના રોજ સવારે ૧૦:૦૦ કલાકની સ્થિતિએ ડેમની વર્તમાન જળસપાટી (P.W.L) ૧૨૩.૪૬ મીટર નોંધાઈ છે, જે તેની ભયજનક સપાટી (FRL) ૧૨૩.૪૪ મીટર કરતાં ૦.૦૨ મીટર વધુ છે.

ચાલુ મોસમમાં અત્યાર સુધી અહીં કુલ ૫૨૭ મિલીમીટર જેટલો નોંધપાત્ર વરસાદ વરસી ચૂક્યો છે, જેના કારણે ડેમમાં પાણીનો જીવંત સંગ્રહ ૩.૩૩ MCM થઈ જતાં ડેમ અત્યારે ૧૦૦ ટકા ક્ષમતા સાથે છલોછલ ભરાઈ ગયો છે.

હાલમાં ઉપરવાસમાંથી ડેમમાં ૫૮.૦૦ ક્યુસેક પાણીની સતત આવક થઈ રહી છે, જેની સામે ડેમ સંપૂર્ણ ભરાયેલો હોવાથી એટલી જ માત્રામાં એટલે કે ૫૮.૦૦ ક્યુસેક પાણી ડેમની ક્રેસ્ટ પરથી ૦.૦૨૫ મીટરની ઊંચાઈએથી ઓવરફ્લો (જાવક) થઈને નદીમાં વહી રહ્યું છે.

ડેમમાં હાલ કુલ જળસંગ્રહ ક્ષમતા ૩.૪૩ MCM છે. ડેમ ઓવરફ્લો થતાં વહીવટી તંત્ર દ્વારા નદી કિનારાના નીચાણવાળા વિસ્તારો અને સંબંધિત ગામોના નાગરિકોને નદી કિનારે નહી  જવા તથા સાવધ રહેવા સત્તાવાર સૂચના આપવામાં આવી છે. અત્રે ઉલ્લેખનીય છે કે તંત્ર દ્વારા જાહેરનામું પ્રસિદ્દ કરીને મનાઈ ફરમાવવામાં આવી હતી.