આંતરરાષ્ટ્રીય સ્તરે માનવસેવા પ્રદાન કરતા ‘વેદ્રુના સંઘ’ ના ૨૦૦ વર્ષ પૂર્ણ થતાં ડાંગ જિલ્લાની દીપ દર્શન માધ્યમિક શાળા ખાતે સાંસ્કૃતિક કાર્યક્રમ સાથે ઉજવણી કરાઈ:
ડાંગ જિલ્લા પંચાયતના પ્રમુખ રાજેશભાઇ ગામીતની ઉપસ્થિતિમાં યોજાયો કાર્યક્રમ:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
આંતરરાષ્ટ્રીય સ્તરે માનવસેવા પ્રદાન કરતા ‘વેદ્રુના સંઘ’ ના ૨૦૦ વર્ષ પૂર્ણ થતાં ડાંગ જિલ્લાની દીપ દર્શન માધ્યમિક શાળા ખાતે સાંસ્કૃતિક કાર્યક્રમ સાથે ઉજવણી કરાઈ:
ડાંગ જિલ્લા પંચાયતના પ્રમુખ રાજેશભાઇ ગામીતની ઉપસ્થિતિમાં યોજાયો કાર્યક્રમ:
દિનકર બંગાળ, આહવા: “ધ કાર્મેલાઈટ સિસ્ટર્સ ઓફ ચેરિટી ટ્રસ્ટ” સંચાલિત દીપ દર્શન માધ્યમિક શાળા અને વેદ્રુના સંઘની સ્થાપનાના ૨૦૦ વર્ષ પૂર્ણ થવાના ઐતિહાસિક અવસર નિમિત્તે ડાંગ જિલ્લા પંચાયત પ્રમુખ રાજેશભાઈ ગામીતની વિશેષ ઉપસ્થિતિમાં શાળામાં, સાંસ્કૃતિક કાર્યક્રમનું આયોજન કરી આ ઉજવણી કરવામાં આવી હતી.
આ પ્રસંગે ઉપસ્થિત મુખ્ય મહેમાન અને ડાંગ જિલ્લા પંચાયતના પ્રમુખશ્રી રાજેશભાઈ ગામીતે સંસ્થાની પ્રશંસનીય સેવાઓને બિરદાવી હતી. તેમણે જણાવ્યું હતું કે, અંતરિયાળ વિસ્તારના બાળકોને ગુણવત્તાયુક્ત શિક્ષણ આપી દેશના મુખ્ય પ્રવાહમાં જોડવાનું ભગીરથ કાર્ય આ સંસ્થા કરી રહી છે. ગત વર્ષે આ શાળા રાજ્ય કક્ષાએ પ્રથમ આવી હતી. તેમજ અહીના વિદ્યાર્થીઓને શિક્ષણ સાથે સંસ્કાર અને શિસ્તનું શિક્ષણ આપવામાં આવે છે તેમ જણાવ્યું હતું.
આ વેદ્રુના સંઘની શરૂઆત ૨૦૦ વર્ષ પહેલાં, ઈ.સ. ૧૮૨૬ માં સ્પેન દેશમાં સેન્ટ જોકિના દે વેદ્રુના નામના એક અસાધારણ મહિલા અને સિસ્ટરે અન્ય નવ સિસ્ટરો સાથે મળીને કરી હતી. આજે વિશ્વના ૪ ખંડોમાં આ સંસ્થાના સિસ્ટરો શિક્ષણ, આરોગ્ય અને સામાજિક ક્ષેત્રે ખૂબ જ મહત્વપૂર્ણ અને પ્રશંસનીય કામગીરી કરી રહ્યા છે.
ડાંગ જિલ્લાના આદિવાસી વિસ્તારોમાં છેલ્લા ૫૦ વર્ષથી વેદ્રુના સંસ્થા દ્વારા સંચાલિત દીપ દર્શન શાળાના સિસ્ટરો અને શિક્ષકો શિક્ષણ ક્ષેત્રે અનન્ય યોગદાન આપી રહ્યા છે. આ સમર્પિત સેનાના પરિણામે જ શૈક્ષણિક વર્ષ ૨૦૨૫-૨૬ માં શાળાનું ધોરણ-૧૦ અને ધોરણ-૧૨ નું બોર્ડનું પરિણામ ૧૦૦% રહ્યું છે, જે સમગ્ર જિલ્લા માટે ગૌરવની બાબત છે. સંસ્થાની આ ૨૦૦ વર્ષની લાંબી અને સફળ સેવાના ઇતિહાસને સુવર્ણ અક્ષરે અંકિત કરવાના ભાગરૂપે શાળાના બાળકોએ મનમોહક સાંસ્કૃતિક પ્રસ્તુતિઓ રજૂ કરી હતી.
આ પ્રસંગે સુબીર નવ જ્યોત ટ્રસ્ટના પ્રમુખ ફાધર અશોક વાઘેલા, જિલ્લા શિક્ષણાધિકારીની કચેરી આહવાના ઇ.આઈ. શ્રી રોહનભાઈ ટંડેલ, આહવા પ્રાથમિક શિક્ષણ અધિકારી શ્રી કલ્પેશભાઈ ચૌધરી, દીપ દર્શન સંસ્થાનના મેનેજર સિસ્ટર નાઈટિંગલ તેમજ વાલી પ્રતિનિધિ શ્રી અનિલભાઈ વાઘ અને મોટી સંખ્યામાં વાલીઓ તેમજ વિદ્યાર્થીઓ ઉપસ્થિત રહ્યાં હતાં.
આ કાર્યક્રમને સફળ બનાવવામાં દીપ દર્શન માધ્યમિક શાળાના આચાર્ય સિસ્ટર સુહાસિની પરમાર, પ્રાથમિક વિભાગના આચાર્ય સિસ્ટર સ્મિતા અને અંગ્રેજી માધ્યમના આચાર્ય સિસ્ટર મનિષાના નેતૃત્વ અને માર્ગદર્શન હેઠળ શાળાના સ્ટાફ મિત્રોએ ભારે જહેમત ઉઠાવી હતી.
