નર્મદા જિલ્લા કલેક્ટર શ્રી ગંગાસિંઘે સાગબારા તાલુકાના વિવિધ ગામોની મુલાકાત લીધી:

0 387 1 minute read

શ્રોત: ગ્રામિણ ટુડે ન્યુઝ, 24×7 વેબ પોર્ટલ

મુલાકાતમાં આરોગ્ય સેવાઓ, ગ્રામ પંચાયતની કામગીરી અને નાગરિક સુવિધાઓની માહિતી મેળવી:

સર્જન વસાવા, ડેડિયાપાડા: નર્મદા જિલ્લા કલેક્ટર શ્રી ગંગાસિંઘે આજરોજ સાગબારા તાલુકાના ધનશેરા, અમીયાર અને સોલિયા ગામોની મુલાકાત લઈને આરોગ્ય સેવાઓ, ગ્રામ પંચાયતની કામગીરી તેમજ ગ્રામ્ય વિકાસ સંબંધિત વિવિધ બાબતોની સ્થળ પર સમીક્ષા કરી હતી.

મુલાકાત દરમિયાન કલેક્ટરશ્રીએ સામુહિક આરોગ્ય કેન્દ્ર, સાગબારાની મુલાકાત લઈને PNC વોર્ડ, ઇમરજન્સી રૂમ, જનરલ વોર્ડ, ડિલિવરી રૂમ, એક્સ-રે રૂમ સહિતના વિવિધ વિભાગોનું નિરીક્ષણ કર્યું હતું. આ દરમિયાન સારવાર હેઠળના દર્દીઓ સાથે વાતચીત કરી તેમની તબિયત અને ઉપલબ્ધ સારવાર અંગે માહિતી મેળવી હતી તેમજ હોસ્પિટલમાં આરોગ્ય સેવાઓની ગુણવત્તા અંગે જરૂરી સૂચનાઓ આપી હતી.

ત્યારબાદ કલેક્ટરશ્રીએ ગ્રુપ ગ્રામ પંચાયત, સાગબારાની મુલાકાત લઈને કચેરીમાં વિવિધ દફતરો અને રજિસ્ટરોની ઝીણવટભરી ચકાસણી કરી હતી. સરકારી રેકોર્ડનું યોગ્ય સંચાલન અને નિયમિત નિભાવણી અંગે માહિતી મેળવી સંબંધિત સ્ટાફને જરૂરી માર્ગદર્શન આપ્યું હતું.

આ ઉપરાંત અમીયાર ગામ ખાતે આવેલ યાહામોગી એગ્રોની મુલાકાત લઈને તેની કામગીરી અંગે માહિતી મેળવી હતી. ત્યારબાદ ગ્રુપ ગ્રામ પંચાયત સોલિયાની મુલાકાત દરમિયાન ગામની વસ્તી, વિવિધ સરકારી રજિસ્ટરો તથા વહીવટી કામગીરીની સમીક્ષા કરી હતી.

મુલાકાત દરમિયાન કલેક્ટરશ્રીએ ગામના વડીલો અને સ્થાનિક નાગરિકો સાથે સંવાદ સાધી ખેતી, બાળકોના શિક્ષણની સુવિધા, આરોગ્ય સેવાઓ તેમજ અન્ય પાયાની સુવિધાઓ અંગે ચર્ચા કરી હતી.

કલેક્ટરશ્રીએ સંબંધિત સ્ટાફને નાગરિકોના પ્રશ્નો અને અરજીઓનો ત્વરિત નિકાલ કરવા, સરકારી કામગીરી સમયસર પૂર્ણ કરવા તેમજ તમામ રજિસ્ટરોનું નિયમિત અને સુવ્યવસ્થિત સંચાલન કરવા વિશેષ સૂચના આપી હતી.