પીપલખેડ પ્રાથમિક શાળામાં ‘વિકસિત ભારત ૨૦૪૭’ અંતર્ગત સી.આર.સી કક્ષાની વક્તૃત્વ સ્પર્ધા યોજાઈ:
શ્રોત: ગ્રામિણ ટુડે ન્યુઝ, 24×7 વેબ પોર્ટલ
પીપલખેડ પ્રાથમિક શાળામાં ‘વિકસિત ભારત ૨૦૪૭’ અંતર્ગત સી.આર.સી કક્ષાની વક્તૃત્વ સ્પર્ધા યોજાઈ:
કમલેશ ગાંવિત, વાંસદા: વાંસદા તાલુકાના પીપલખેડ પ્રાથમિક શાળા ખાતે ‘વિકસિત ભારત ૨૦૪૭’ અંતર્ગત સી.આર.સી. કક્ષાની વક્તૃત્વ સ્પર્ધાનું આયોજન કરવામાં આવ્યું હતું. કાર્યક્રમની શરૂઆત તાલુકા પંચાયત પીપલખેડનાં સદસ્ય શ્રીમતી જયશ્રીબેન માહલા તથા વાંસદા તાલુકા પંચાયતના પૂર્વ ઉપપ્રમુખ દશરથભાઈ ભોયાના હસ્તે દીપ પ્રાગટ્યથી કરવામાં આવી હતી.
ક્લસ્ટરના કો-ઓર્ડિનેટર ચંદ્રકાંતભાઈ દ્વારા ઉપસ્થિત મહેમાનોનું શાબ્દિક તેમજ પુષ્પગુચ્છથી સ્વાગત કરવામાં આવ્યું હતું. આ પ્રસંગે દશરથભાઈ ભોયાએ ‘વિકસિત ભારત ૨૦૪૭’ અંગે વડાપ્રધાન નરેન્દ્રભાઈ મોદીની સંકલ્પના અને તેના ઉદ્દેશો અંગે વિદ્યાર્થીઓને માહિતગાર કર્યા હતા.
વક્તૃત્વ સ્પર્ધામાં ક્લસ્ટરની કુલ આઠ શાળાના વિદ્યાર્થીઓએ ઉત્સાહપૂર્વક ભાગ લીધો હતો. વિદ્યાર્થીઓએ આપવામાં આવેલા વિષયને અનુરૂપ સુંદર અને આત્મવિશ્વાસભર્યું વક્તવ્ય રજૂ કરી પોતાની વક્તૃત્વકળાનું પ્રદર્શન કર્યું હતું.
કાર્યક્રમ દરમિયાન ઉપસ્થિત મહેમાનો દ્વારા સ્પર્ધામાં ભાગ લેનાર તમામ વિદ્યાર્થીઓને પ્રોત્સાહનરૂપે નોટબુક અને બોલપેનનું વિતરણ કરવામાં આવ્યું હતું. અંતે પીપલખેડ પ્રાથમિક શાળાના આચાર્ય શ્રીમતી અલ્વીનાબેને ઉપસ્થિત મહેમાનો, શિક્ષકો તથા વિદ્યાર્થીઓનો આભાર વ્યક્ત કરી કાર્યક્રમનું સમાપન કર્યું હતું.
