શ્રોત: ગ્રામિણ ટુડે ન્યુઝ, 24×7 વેબ પોર્ટલ
ડાંગની યુવતીના નામે નકલી ઇન્સ્ટાગ્રામ આઈડી બનાવી અભદ્ર પોસ્ટ કર્યાની ફરિયાદ:
દિનકર બંગાળ, આહવા: ડાંગ જિલ્લાની ૨૨ વર્ષીય યુવતીના નામે અજાણ્યા શખ્સે નકલી ઇન્સ્ટાગ્રામ આઈડી બનાવી યુવતી તથા તેના પિતાના ફોટા સાથે અભદ્ર લખાણો પોસ્ટ કરી બદનામ કરવાનો પ્રયાસ કર્યો હોવાની ફરિયાદ સામે આવી છે.
ફરિયાદ મુજબ, ‘rupalgavit7596’ નામની નકલી ઇન્સ્ટાગ્રામ આઈડી પર યુવતી અને તેના પિતાના ફોટા સાથે અપમાનજનક શબ્દો લખીને પોસ્ટ કરવામાં આવી હતી. આ અંગે યુવતીએ સાયબર ક્રાઇમ હેલ્પલાઇન નંબર ૧૯૩૦ પર ફરિયાદ નોંધાવી હતી. સમાજમાં બદનામી થવાની આશંકાને કારણે શરૂઆતમાં ફરિયાદ ન કરી હોવાનું યુવતીએ જણાવ્યું હતું. બાદમાં પરિવારજનો સાથે ચર્ચા કર્યા પછી તેણે પોતાના પિતા સાથે ફરિયાદ કરી નકલી આઈડીના સ્ક્રીનશોટ પણ રજૂ કર્યા હતા.
યુવતીએ નકલી આઈડી બનાવનાર અજાણ્યા શખ્સને શોધી તેની સામે કાયદેસરની કાર્યવાહી કરવાની માંગ કરી છે. સમગ્ર મામલે સાપુતારા પોલીસ સ્ટેશનના પોલીસ ઇન્સ્પેક્ટર દ્રારા વધુ તપાસ હાથ ધરાઈ છે.
