આહવામાં ચિકનના ઓર્ડરના બહાને વેપારી સાથે રૂ. ૪૫ હજારની છેતરપિંડી:

શ્રોત: ગ્રામિણ ટુડે ન્યુઝ, 24×7 વેબ પોર્ટલ

આહવામાં ચિકનના ઓર્ડરના બહાને વેપારી સાથે રૂ. ૪૫ હજારની છેતરપિંડી:

ખોટા Google Pay મેસેજના આધારે ત્રણ વખતમાં નાણાં પડાવ્યા; ડિજિટલ ભારતમાં સાયબર ઠગાઈ સામે કડક કાર્યવાહીની માંગ

દિનકર બંગાળ, આહવા: ડિજિટલ ઇન્ડિયાના યુગમાં ઓનલાઈન વ્યવહારો જેટલા સરળ બન્યા છે, તેટલા જ સાયબર ઠગાઈના કિસ્સાઓ ચિંતાજનક બનતા જાય છે. આહવામાં ચિકનની દુકાન ચલાવતા મુનાફભાઈ સુલેમાનભાઈ શાહ સાથે ચિકનના ઓર્ડરના બહાને રૂ. ૪૫,૦૦૦ની ઓનલાઈન છેતરપિંડી થયાની ઘટના સામે આવી છે.

ફરિયાદ મુજબ, ગત તા. ૨૦ એપ્રિલના રોજ અજાણ્યા શખ્સોએ સાત અને નવ કિલો ચિકનનો ઓર્ડર આપ્યો હતો. ત્યારબાદ Google Payમાં વધુ રૂપિયા જમા થયાના ખોટા મેસેજ મોકલી ભૂલથી વધારાની રકમ આવી હોવાનું કહી વેપારી પાસેથી ત્રણ વખતમાં રૂ. ૧૨,૬૦૦, રૂ. ૧૬,૨૦૦ અને રૂ. ૧૬,૨૦૦ મળી કુલ રૂ. ૪૫,૦૦૦ ટ્રાન્સફર કરાવી લીધા હતા. બાદમાં છેતરપિંડી થયાનું જણાતાં વેપારીએ સાયબર હેલ્પલાઈન ૧૯૩૦ પર ફરિયાદ નોંધાવી હતી. ત્યારબાદ આ અંગે આહવા પોલીસ સ્ટેશનમાં ફરિયાદ નોંધાવી છે. પોલીસ ઇન્સ્પેક્ટર કે.બી.સાંખલા એ ગુનો નોંધી આગળની તપાસ હાથ ધરી છે.

ડિજિટલ ભારત સામે સાયબર ઠગાઈનો પડકાર:

ભૂતકાળમાં પણ આવા અનેક કિસ્સાઓ સામે આવ્યા છે, છતાં સાયબર ઠગો સામાન્ય નાગરિકો અને વેપારીઓને નિશાન બનાવી રહ્યા છે. ત્યારે સવાલ એ છે કે ડિજિટલ ભારતના સપનાની સાથે સાયબર સુરક્ષાની ખાતરી ક્યારે મળશે? સાયબર ગુનેગારો સામે ઝડપી તપાસ, નાણાંની તાત્કાલિક રોકથામ, ભોગ બનેલાઓને ન્યાય અને કડક કાર્યવાહીની અસરકારક વ્યવસ્થા ક્યારે ઊભી થશે?

સાયબર ઠગાઈનો આ દોર ક્યારે અટકશે અને સરકાર તથા પોલીસ તંત્ર તેનો કાયમી ઉકેલ ક્યારે લાવશે? આ સવાલ આજે દરેક ડિજિટલ વ્યવહાર કરતા નાગરિક માટે મહત્ત્વનો બન્યો છે. જાગૃતિ જરૂરી છે, પરંતુ માત્ર જનજાગૃતિ પૂરતી નથી, સાયબર ગુનેગારો સામે સમયસર અને અસરકારક કાર્યવાહી પણ એટલી જ અનિવાર્ય છે.