ખમાર કન્યા છાત્રાલયમાં મહિલા નેતૃત્વ દિવસની ઉજવણી, 181 અભયમ અને 1098 ટીમે આપી સુરક્ષા અંગે જાગૃતિ:
શ્રોત: ગ્રામિણ ટુડે ન્યુઝ, ૨૪x૭ વેબ પોર્ટલ
ખમાર કન્યા છાત્રાલયમાં મહિલા નેતૃત્વ દિવસની ઉજવણી, 181 અભયમ અને 1098 ટીમે આપી સુરક્ષા અંગે જાગૃતિ:
મહિલા નેતૃત્વ દિવસ નિમિત્તે વિદ્યાર્થિનીઓને મહિલા અને બાળ સુરક્ષાનું માર્ગદર્શન
સર્જન વસાવા, ડેડીયાપાડા: નારી વંદન ઉત્સવ–2026 અંતર્ગત ઉજવાતા મહિલા નેતૃત્વ દિવસનો મુખ્ય હેતુ મહિલાઓ અને કિશોરીઓમાં નેતૃત્વ ક્ષમતાનો વિકાસ કરવો, આત્મવિશ્વાસ વધારવો, પોતાના અધિકારો અને જવાબદારીઓ પ્રત્યે જાગૃત બનાવવું તેમજ શિક્ષણ, સુરક્ષા અને સ્વાવલંબન દ્વારા સમાજના સર્વાંગી વિકાસમાં તેમની સક્રિય ભાગીદારીને પ્રોત્સાહિત કરવાનો છે.
આ હેતુને અનુરૂપ 181 અભયમ મહિલા હેલ્પલાઇન નર્મદા ટીમ તથા 1098 ચાઈલ્ડ હેલ્પલાઇન ટીમના સંયુક્ત ઉપક્રમે રાજપીપળા તાલુકાના ખમાર ગામ સ્થિત કન્યા છાત્રાલય ખાતે ધોરણ 9 અને 10માં અભ્યાસ કરતી વિદ્યાર્થિનીઓ માટે જાગૃતિ કાર્યક્રમ યોજાયો.
કાર્યક્રમ દરમિયાન વિદ્યાર્થિનીઓને 181 અભયમ મહિલા હેલ્પલાઇન દ્વારા મહિલાઓને મળતી તાત્કાલિક સહાય, ઘરેલુ હિંસા, મહિલા સુરક્ષા, સાયબર સુરક્ષા, કાનૂની માર્ગદર્શન અને 181 સેવાની કામગીરી અંગે વિગતવાર માહિતી આપવામાં આવી. ઉપરાંત 1098 ચાઈલ્ડ હેલ્પલાઇન દ્વારા બાળકોના અધિકારો, બાળ સુરક્ષા, બાળલગ્ન પ્રતિબંધ, બાળમજૂરી, બાળ શોષણથી રક્ષણ તેમજ સંકટગ્રસ્ત બાળકો માટે ઉપલબ્ધ 24×7 ટોલ ફ્રી સેવા અંગે માર્ગદર્શન આપવામાં આવ્યું.
આ ઉપરાંત વિદ્યાર્થિનીઓને મહિલા અને બાળ કલ્યાણ વિભાગની વિવિધ સરકારી યોજનાઓ અંગે માહિતગાર કરવામાં આવી અને જરૂરિયાતના સમયે નિર્ભયપણે 181 અભયમ મહિલા હેલ્પલાઇન તથા 1098 ચાઈલ્ડ હેલ્પલાઇનની સેવાઓનો ઉપયોગ કરવા અપીલ કરવામાં આવી.
કાર્યક્રમ દરમિયાન વિદ્યાર્થિનીઓએ ઉત્સાહપૂર્વક ભાગ લીધો, પ્રશ્નોત્તરી દ્વારા પોતાની જિજ્ઞાસાઓનું સમાધાન મેળવ્યું અને મહિલા સુરક્ષા તથા બાળ સુરક્ષા અંગે જાગૃત રહેવાનો સંકલ્પ વ્યક્ત કર્યો.
