નારી વંદન ઉત્સવ–૨૦૨૬: નર્મદામાં ૧૮૧ અભયમ અને ૧૦૯૮ ટીમે મહિલા-બાળ સુરક્ષા અંગે ફેલાવી વ્યાપક જનજાગૃતિ
શ્રોત: ગ્રામિણ ટુડે ન્યુઝ, 24×7 વેબ પોર્ટલ
નારી વંદન ઉત્સવ–૨૦૨૬: નર્મદામાં ૧૮૧ અભયમ અને ૧૦૯૮ ટીમે મહિલા-બાળ સુરક્ષા અંગે ફેલાવી વ્યાપક જનજાગૃતિ
સુરક્ષિત મહિલા–સુરક્ષિત બાળપણ’ના સંદેશ સાથે નર્મદામાં મહિલા સુરક્ષા દિવસની ઉજવણી
સર્જન વસાવા, ડેડીયાપાડા: નારી વંદન ઉત્સવ–૨૦૨૬ અંતર્ગત નર્મદા જિલ્લાના આદર્શ નિવાસી કન્યા છાત્રાલય રાજપીપલા ખાતે ૧૮૧ અભયમ મહિલા હેલ્પલાઇન તથા ૧૦૯૮ ચાઈલ્ડ હેલ્પલાઇન ટીમ દ્વારા સંયુક્ત રીતે મહિલા સુરક્ષા દિવસની ઉજવણી કરવામાં આવી હતી.
કાર્યક્રમ દરમિયાન મહિલાઓ અને બાળકોની સુરક્ષા માટે જરૂરી જાગૃતિ ફેલાવવામાં આવી હતી. ઉપસ્થિતોને મહિલા સુરક્ષા, કાનૂની અધિકારો, સાયબર સુરક્ષા, ઘરેલુ હિંસા સામે રક્ષણ, બાળલગ્ન પ્રતિબંધ તથા સરકાર દ્વારા ઉપલબ્ધ વિવિધ સહાય સેવાઓ અંગે વિસ્તૃત માહિતી આપવામાં આવી હતી.
આ પ્રસંગે ૧૮૧ અભયમ મહિલા હેલ્પલાઇન ટીમ દ્વારા મહિલાઓને મળતી ૨૪x૭ નિઃશુલ્ક અને તાત્કાલિક સહાય સેવાઓ અંગે માર્ગદર્શન આપવામાં આવ્યું હતું. તેમજ ૧૦૯૮ ચાઈલ્ડ હેલ્પલાઇન ટીમ દ્વારા બાળકોની સુરક્ષા, સંભાળ અને રક્ષણ માટેની સેવાઓ અંગે માહિતી આપવામાં આવી હતી.
મુશ્કેલીમાં મુકાયેલા બાળકો, બાળમજૂરી, બાળલગ્ન, શોષણ, ત્યજી દેવાયેલા બાળકો અથવા કોઈપણ જોખમી પરિસ્થિતિમાં રહેલા બાળકો માટે ૧૦૯૮ પર સંપર્ક કરી તાત્કાલિક સહાય મેળવી શકાય છે તે અંગે પણ સમજ આપવામાં આવી હતી.
કાર્યક્રમના અંતે ઉપસ્થિતોને મહિલા અને બાળ સુરક્ષા માટે સજાગ રહેવા તથા જરૂરિયાતમંદ વ્યક્તિઓ સુધી ૧૮૧ અભયમ અને ૧૦૯૮ ચાઈલ્ડ હેલ્પલાઇનની સેવાઓ પહોંચાડવા માટે સહભાગી બનવા અનુરોધ કરવામાં આવ્યો હતો.
