સેલંબામાં ભારે વરસાદથી ત્રણ કોઝવેને નુકસાન, ત્વરિત રાહત કામગીરીથી માર્ગ વ્યવહાર પૂર્વવત કરાયો:
શ્રોત: ગ્રામિણ ટુડે ન્યુઝ 24×7 વેબ પોર્ટલ
સેલંબામાં ભારે વરસાદથી ત્રણ કોઝવેને નુકસાન, ત્વરિત રાહત કામગીરીથી માર્ગ વ્યવહાર પૂર્વવત કરાયો:
સર્જન વસાવા, ડેડીયાપાડા: સાગબારા તાલુકાના સેલંબા ગામમાં સતત ભારે વરસાદને કારણે ઉપરવાસ માંથી આવેલા પાણીના જોરદાર પ્રવાહથી ગામના ત્રણ કોઝવે (કોઝવે બ્રિજ)ને નુકસાન પહોંચ્યું હતું. કોઝવે ઉપર પાણી ફરી વળતાં અને કચરો જમા થતાં માર્ગ વ્યવહાર અસ્થાયી રીતે ખોરવાયો હતો, જેના કારણે સ્થાનિક ગ્રામજનો, વાહનચાલકો તેમજ શાળાએ જતા વિદ્યાર્થીઓને ભારે મુશ્કેલીનો સામનો કરવો પડ્યો હતો.
પરિસ્થિતિની ગંભીરતાને ધ્યાનમાં રાખીને સેલંબા ગ્રામ પંચાયત, પ્રદેશ યુવા મોરચાના મંત્રી આકાશભાઈ તડવી, સરપંચ, આપદા મિત્રો તથા પોલીસ સ્ટાફે સતત વરસાદ વચ્ચે સ્થળ પર પહોંચી તાત્કાલિક રાહત કામગીરી હાથ ધરી હતી.
રાહત કામગીરી દરમિયાન ત્રણેય કોઝવે પાસે જમા થયેલો કચરો દૂર કરવામાં આવ્યો, બ્રિજના પાઈપોમાં ભરાયેલા અવરોધો દૂર કરી પાણીના પ્રવાહને સરળ બનાવવામાં આવ્યો. ઉપરાંત અંબિકા નદી પર આવેલા સેલંબાના મુખ્ય પુલ ઉપર અટવાયેલો કચરો પણ જેસીબી મશીનની મદદથી સાફ કરવામાં આવ્યો, જેથી પાણીનો પ્રવાહ સામાન્ય બની શક્યો.
પાણીનું સ્તર ઘટતાં તાત્કાલિક સફાઈ કામગીરી પૂર્ણ કરી માર્ગને ફરી વાહનવ્યવહાર માટે ખુલ્લો મુકવામાં આવ્યો. ખાસ કરીને શાળાએ જતા બાળકો અને અન્ય રાહદારીઓને કોઈ મુશ્કેલી ન પડે તે માટે યુદ્ધના ધોરણે કામગીરી કરવામાં આવી હતી.
સ્થાનિક લોકોએ સમયસર અને સંકલિત રીતે હાથ ધરાયેલી રાહત કામગીરી બદલ ગ્રામ પંચાયત, આપદા મિત્રો, પોલીસ વિભાગ તેમજ કામગીરીમાં જોડાયેલા તમામ કર્મચારીઓ અને સ્વયંસેવકોનો આભાર વ્યક્ત કર્યો.
