“વિકાસના દાવાઓની પોલ ખુલ્લી: અરેઠીનો રસ્તો આજે પણ બિસ્માર, નેતાઓના વિકાસનો ગ્રાફ સતત ઉપર!”
શ્રોત: ગ્રામિણ ટુડે ન્યુઝ, 24×7 વેબ પોર્ટલ
“વિકાસના દાવાઓની પોલ ખુલ્લી: અરેઠીનો રસ્તો આજે પણ બિસ્માર, નેતાઓના વિકાસનો ગ્રાફ સતત ઉપર!”
“ચૂંટણીમાં વચનો, પછી ભૂલી ગયા અરેઠી! રસ્તો પણ બિસ્માર, નેટવર્ક પણ ગાયબ”
“ગામનો વિકાસ શૂન્ય, નેતાઓનો વિકાસ પૂરજોશમાં! અરેઠી આજે પણ વિકાસથી વંચિત”
સર્જન વસાવા, ડેડીયાપાડા: નર્મદા જિલ્લાના દેડીયાપાડા તાલુકાના અરેઠી ગામને જોડતો મુખ્ય માર્ગ વર્ષોથી બિસ્માર હાલતમાં હોવાથી ગ્રામજનો ભારે હાલાકી ભોગવી રહ્યા છે. વિકાસના મોટા મોટા દાવા અને જાહેરાતો વચ્ચે અરેઠી ગામ આજે પણ મૂળભૂત સુવિધાઓથી વંચિત હોવાનું ગ્રામજનો જણાવી રહ્યા છે.
ગામમાં જવા માટેનો રસ્તો એટલો ખરાબ થઈ ગયો છે કે વરસાદી મોસમમાં વાહન ચલાવવું જોખમી બની જાય છે. રોજિંદા કામે જતા લોકો, વિદ્યાર્થીઓ, ગર્ભવતી મહિલાઓ, વૃદ્ધો તેમજ દર્દીઓને ભારે મુશ્કેલીનો સામનો કરવો પડે છે. અનેક વખત રજૂઆતો છતાં રસ્તાના સમારકામ કે નવા માર્ગના નિર્માણ અંગે કોઈ અસરકારક કાર્યવાહી થઈ નથી.
ગ્રામજનોમાં એવી લાગણી છે કે ચૂંટણી પહેલાં નેતાઓ અને ચૂંટાયેલા પ્રતિનિધિઓ ગામમાં આવી વિકાસના વચનો આપે છે, પરંતુ ચૂંટણી પૂર્ણ થતાં જ ગામ અને ગામના પ્રશ્નો ભૂલી જાય છે. લોકોમાં એવી ચર્ચા છે કે ગામના રસ્તાનો વિકાસ થયો નથી, પરંતુ વર્ષો દરમિયાન નેતાઓ અને ચૂંટાયેલા પ્રતિનિધિઓનો વિકાસ જરૂર થયો છે.
માત્ર રસ્તાની જ નહીં, પરંતુ અરેઠી ગામમાં મોબાઇલ નેટવર્કની પણ ગંભીર સમસ્યા છે. નેટવર્કના અભાવે વિદ્યાર્થીઓને ઓનલાઈન અભ્યાસ, સરકારી યોજનાઓના ઓનલાઈન ફોર્મ ભરવા, બેન્કિંગ કામગીરી, આરોગ્ય સેવાઓ અને અન્ય ડિજિટલ સુવિધાઓનો લાભ મેળવવામાં ભારે મુશ્કેલી પડે છે. ડિજિટલ યુગમાં પણ ગામના લોકો કનેક્ટિવિટીના અભાવે પાયાની સેવાઓથી વંચિત રહેવા મજબૂર બન્યા છે.
ગ્રામજનોની માંગ છે કે અરેઠી ગામને જોડતા રસ્તાનું તાત્કાલિક નવીનીકરણ કરવામાં આવે તેમજ ગામમાં મોબાઇલ નેટવર્ક માટે જરૂરી ટાવર અથવા અન્ય વ્યવસ્થા ઊભી કરવામાં આવે, જેથી લોકોને રોજિંદી સમસ્યાઓમાંથી રાહત મળે.
હવે જોવાનું એ રહેશે કે વિકાસના દાવા કરતી સરકાર અને જવાબદાર તંત્ર અરેઠી ગામના આ વર્ષો જૂના પ્રશ્નોનો ક્યારે અંત લાવે છે કે પછી ગ્રામજનોને હજુ પણ માત્ર આશ્વાસનોનો સહારો જ રાખવો પડશે.
