દીકરીના જન્મદિવસે ફળ અને રોપાઓનું વિતરણ, સમાજને આપ્યો પર્યાવરણ જાગૃતિનો અનોખો સંદેશ:

શ્રોત: ગ્રામિણ ટુડે ન્યુઝ, 24×7 વેબ પોર્ટલ

દીકરીના જન્મદિવસે ફળ અને રોપાઓનું વિતરણ, સમાજને આપ્યો પર્યાવરણ જાગૃતિનો અનોખો સંદેશ:

કેક નહીં, રોપાઓની ભેટ: દીકરીના જન્મદિવસે ગણેશભાઈ વસાવાની અનોખી પહેલ

જન્મદિવસ બન્યો પર્યાવરણ જાગૃતિનો ઉત્સવ, ગ્રામજનોને અપાયા વૃક્ષોના રોપાઓ

સર્જન વસાવા, નેત્રંગ: આજના સમયમાં જન્મદિવસની ઉજવણી કેક કાપવા અને ભવ્ય પાર્ટીઓ સુધી મર્યાદિત રહી ગઈ છે, ત્યારે નેત્રંગ તાલુકાના આંજોલી ગામના રહેવાસી તથા આરોગ્ય વિભાગમાં ફરજ બજાવતા શ્રી ગણેશભાઈ નાનજીભાઈ વસાવાએ પોતાની દીકરી કાવ્યાબેનના જન્મદિવસને અનોખી રીતે ઉજવી સમાજ માટે પ્રેરણાદાયી ઉદાહરણ પૂરું પાડ્યું છે. જન્મદિવસ નિમિત્તે તેમણે ગ્રામજનો વચ્ચે ફળ તથા વિવિધ જાતના ઝાડના રોપાઓનું વિતરણ કરી પર્યાવરણ સંરક્ષણ અને વૃક્ષારોપણનો સંદેશ આપ્યો હતો.

આ પ્રસંગે તેમણે દરેક ગ્રામજનને વધુમાં વધુ વૃક્ષો વાવવા, તેનું જતન કરવા અને હરિયાળું પર્યાવરણ નિર્માણમાં સહભાગી બનવા અપીલ કરી હતી. શ્રી ગણેશભાઈ વસાવાએ જણાવ્યું હતું કે જન્મદિવસ જેવા શુભ પ્રસંગોને માત્ર ઔપચારિક ઉજવણી પૂરતા મર્યાદિત રાખવાને બદલે સમાજહિત અને પર્યાવરણ પ્રત્યેની જવાબદારી સાથે જોડવામાં આવે તો તે સાચા અર્થમાં યાદગાર બની શકે. વૃક્ષોનું વાવેતર અને તેનું સંરક્ષણ આવનારી પેઢીને સ્વચ્છ, હરિયાળું અને સ્વસ્થ પર્યાવરણની અમૂલ્ય ભેટ સમાન છે.

આ અનોખી પહેલને ગ્રામજનોએ હર્ષભેર આવકારી હતી અને કાવ્યાબેનને જન્મદિવસની શુભેચ્છાઓ પાઠવી હતી. સાથે જ ઉપસ્થિત લોકોએ પણ જન્મદિવસ સહિતના શુભ પ્રસંગોની ઉજવણી વૃક્ષારોપણ અને સમાજોપયોગી કાર્યો સાથે કરવાની પ્રતિબદ્ધતા વ્યક્ત કરી હતી.

ગણેશભાઈ વસાવાની આ પહેલ માત્ર જન્મદિવસની ઉજવણી પૂરતી નહીં, પરંતુ પર્યાવરણ સંરક્ષણ અને સામાજિક જવાબદારીનો પ્રેરણાદાયી સંદેશ બની રહી છે. આવી પહેલ અન્ય લોકો માટે પણ અનુસરવા યોગ્ય ઉદાહરણ બની શકે છે.