શ્રોત: ગ્રામિણ ટુડે ન્યુઝ, ૨૪x૭ વેબ પોર્ટલ
ચીકદા તાલુકા કક્ષાની એથ્લેટિક્સમાં મોડેલ ડે સ્કૂલના ખેલાડીઓનો સુવર્ણ દેખાવ:
દોડથી લઈ ગોળાફેંક સુધી મોડેલ ડે સ્કૂલનો દબદબો, SGFI સ્પર્ધામાં ચમક્યા ખેલાડીઓ
સર્જન વસાવા, ડેડીયાપાડા: ચીકદા તાલુકા કક્ષાની SGFI શાળાકીય રમતોત્સવ–2026 અંતર્ગત એથ્લેટિક્સ સ્પર્ધાનું આયોજન ભરાડા પ્રાથમિક શાળાના મેદાન ખાતે કરવામાં આવ્યું હતું. આ સ્પર્ધામાં મોડેલ ડે સ્કૂલ, ચીકદાના વિદ્યાર્થીઓએ ઉત્કૃષ્ટ પ્રદર્શન કરી વિવિધ સ્પર્ધાઓમાં અનેક પ્રથમ અને દ્વિતીય ક્રમ પ્રાપ્ત કરીને શાળાનું તેમજ તાલુકાનું ગૌરવ વધાર્યું છે.
અંડર-17 વિભાગમાં ગુલાબકુમાર રમેશભાઈ વસાવાએ 100 મીટર દોડમાં પ્રથમ, સાહિલકુમાર અશ્વિનભાઈ વસાવાએ 800 મીટર દોડમાં પ્રથમ, પ્રિયાંશકુમાર રાકેશભાઈ વસાવાએ 1500 મીટર દોડમાં પ્રથમ સ્થાન મેળવ્યું હતું.
પ્રીતિકાબેન સુરેશભાઈ વસાવાએ ગોળાફેંક તથા ચક્રફેંક એમ બંને સ્પર્ધામાં પ્રથમ સ્થાન હાંસલ કર્યું હતું. પ્રિયાંશીબેન સંજયભાઈ વસાવાએ ગોળાફેંકમાં દ્વિતીય સ્થાન મેળવ્યું હતું. આર્તિકાબેન દીવાનજીભાઈએ 100 મીટર દોડમાં પ્રથમ સ્થાન મેળવ્યું હતું.
અર્ચનાબેન જીતેન્દ્રભાઈ વસાવાએ 1500 મીટર દોડમાં પ્રથમ તથા લાંબી કૂદમાં દ્વિતીય સ્થાન મેળવ્યું હતું. જ્યારે પ્રિયાબેન રાજેન્દ્રભાઈ વસાવાએ 800 મીટર દોડમાં પ્રથમ સ્થાન મેળવી શાળાને વધુ એક ગૌરવ અપાવ્યું હતું.
અંડર-14 વિભાગમાં પ્રિયાંશીબેન ઈલેશભાઈ વસાવાએ લાંબી કૂદ સ્પર્ધામાં દ્વિતીય સ્થાન મેળવી નોંધપાત્ર સફળતા મેળવી હતી.
આ તમામ વિદ્યાર્થીઓએ શાળાના આચાર્ય સુરેન્દ્રભાઈ એસ. વસાવા તેમજ સમગ્ર શિક્ષક સ્ટાફના માર્ગદર્શન હેઠળ નિયમિત મહેનત અને શિસ્તબદ્ધ તાલીમના આધારે આ સિદ્ધિ મેળવી છે.
વિદ્યાર્થીઓની આ ઉત્કૃષ્ટ સફળતા બદલ શાળા પરિવાર દ્વારા તમામ વિજેતા ખેલાડીઓને અભિનંદન પાઠવવામાં આવ્યા હતા તેમજ આગામી જિલ્લા કક્ષાની સ્પર્ધાઓ માટે શુભેચ્છાઓ વ્યક્ત કરવામાં આવી હતી.
